Ի տարբերություն ՀՅԴ-ի, «Ժառանգության» եւ ՀԱԿ-ի, «Բարգավաճ Հայաստան» խորհրդարանական խմբակցությունն այսօր հայտարարությամբ չհստակեցրեց իր՝ ընդդիմություն լինելը: Aravot.am-ի հետ զրույցում այս առիթով «Ժառանգություն» կուսակցության քաղխորհրդի անդամ Ստեփան Սաֆարյանն ասաց, որ ԱԺ կանոնակարգ-օրենքն իմպերատիվ պահանջ է դնում, որպեսզի ԱԺ-ում ներկայացված խմբակցությունները հստակ ներկայացնեն՝ ընդդիմությո՞ւն են, թե՞ իշխանություն. «Եթե ԲՀԿ-ն հանդես չի եկել հայտարարությամբ, որ ինքն ընդդիմություն է, ապա, այդ դեպքում, պետք է ասել, որ ԱԺ կանոնակարգ-օրենքով ընձեռված հնարավորություններից նա պետք է հրաժարվի: Այդ իրավունքները երաշխավորված են ընդդիմության համար»: Խոսքը վերաբերում է հանձնաժողովների նախագահներ եւ փոխնախագահներ ունենալուն:
Ստեփան Սաֆարյանի կարծիքով, ԲՀԿ-ի հանձնաժողովների նախագահների եւ փոխնախագահների պաշտոնները պետք է վերաբաշխվեն ընդդիմադիր խմբակցությունների միջեւ: Հիշեցնենք, որ երեկ Aravot.am-ի հետ զրույցում ԲՀԿ մամուլի խոսնակ Տիգրան Ուրիխանյանն էլ ասել էր, որ ԱԺ կանոնակարգ-օրենքը նման իմպերատիվ պահանջ չի դնում:
Այսօր «ՀԺ»-ին տված հարցազրույցում ՀՀԿ խմբակցության ղեկավար Գալուստ Սահակյանը խոսելով ԲՀԿ-ի ընդդիմություն-իշխանություն կեցվածքի մասին՝ նկատել էր, որ ԲՀԿ-ն ոչ իշխանություն է, ոչ ընդդիմություն. գտնվում է կառուցողական դաշտում՝ լավին՝ լավ է ասում, վատին՝ վատ: Այս առիթով էլ Ստեփան Սաֆարյանն ասաց. «ԱԺ կանոնակարգում նման կատեգորիաներ չկան: Կա կառավարություն ձեւավորած քաղաքական ուժեր հասկացությունը եւ ընդդիմություն հասկացությունը: Եթե կառուցողական դաշտը քաղաքագիտական եւ իրավական կատեգորիա է, ուրեմն, բարի լինեին, այն ամրագրել ԱԺ կանոնակարգ-օրենքով: Քանի դեռ չեն ամրագրել, որ կա երրորդ դաշտ՝ կառուցողական, ապա ստիպված պետք է լինեն կանոնակարգը կիրառել այն տեսքով, ինչպես որ կա: Իսկ այս գրված է կառավարություն ձեւավորող ուժերի եւ ընդդիմության համար»:
Կարդացեք նաև
Նելլի ԳՐԻԳՈՐՅԱՆ
