Aravot.am-ը Ադրբեջանահայերի ասամբլեայի նախագահ Գրիգորի Այվազյանի հետ զրույցում խնդրեց մեկնաբանել Ռուսաստանի պահվածքն ու դիրքորոշումը շփման գծում վերջին զարգացումների կապակցությամբ: Պարոն Այվազյանը նշեց. «Նուրբ հարցի եք դիպչում: Փաստորեն, Ադրբեջանն այսօր սպասում է Ռուսաստանի դիրքորոշման ճշգրտմանը պատերազմի վերսկսման համար: Բնականաբար, Ռուսաստանը ոչ թե Հայաստանի, այլ սեփական շահերից ելնելով չպետք է որ թույլ տա իրադարձությունների ոչ ցանկալի զարգացումը Հարավային Կովկասում, քանի որ ՀՀ-ի և ԼՂՀ-ի ցանկացած վտանգի, կամ ստատուս քվոյի փոփոխության հետ կապված զարգացման արդյունքում Ռուսաստանը կարող է վերահսկողությունը կորցնել Հյուսիսային Կովկասի նկատմամբ: Ուստի ՌԴ-ի շահերից բխում է հայամետ դիրքորոշումը»:
Սակայն, ի հեճուկս նշվածի, պարոն Այվազյանը հիասթափված է Ռուսաստանից. «Խորը հիասթափություն ապրեցի Մեքսիկայում տեղի ունեցած մեծ քսանյակի գագաթաժողովում եռանախագահների հայտարարությունից հետո՝ ղարաբաղյան հարցի հետ կապված: Հայտարարությունը անհասցե և լղոզված է այն առումով, որ այդտեղ ասվում է, թե վերջիվերջո կողմերը պիտի հաշտության մոդուս գտնեն, որ եթե պատերազմ սկսվի, միայն բնակչության տառապանքները կավելացնի: Ուրեմն դե ֆակտո թույլ են տալիս մտածել, որ պատերազմը կարող է սկսվել: Ու կրկնակի ցավալի է , որ ՌԴ-ն այսպիսի հայտարարության տակ ստորագրեց»:
Մեր հարցին՝ ինչո°վ է պայմանավորված Ռուսաստանի նման պահվածքը, պարոն Այվազյանն ի պատասխան վկայակոչեց Ռուսաստանի ներքին և արտաքին քաղաքական խնդիրները:
Կարդացեք նաև
Տաթև ՀԱՐՈՒԹՅՈՒՆՅԱՆ
