Հունիսի 20-ին ավարտվել է 2011թ. հոկտեմբերի 2-ի Այրումի սողանքից քանդված ոռոգման ինքնահոս ջրագծի վերականգնումը: Այն ոռոգում է Դեբեդի հովտի 8 համայնքների ավելի քան 1000 հա տարածք: Նոյեմբերյանի ոռոգման համակարգերի ձեռնարկության տնօրեն Սեդրակ Եսայանը հայտնեց, որ վերականգնվել է սողանքից քանդված խողովակաշարի 210 մ հատված: Սակայն սողանքից քանդված միջպետական ճանապարհի 350 մ հատվածի վերականգնումը դեռ չի ավարտվել: Պետբյուջեի 550 միլիոն դրամ ֆինանսավորմամբ, մարտի կեսերից սկսված այդ աշխատանքներն իրականացնում է Էդուարդ Բեզոյանի ղեկավարած «Ճանապարհաշինարար» ՍՊԸ-ն: Նշենք, որ 2011թ. դեկտեմբերին, ձմռան ցրտին պետբյուջեի ֆինանսավորմամբ Իջեւանում, Կողբում, Նոյեմբերյանում համայնքային նշանակության ճանապարհներ էին ասֆալտապատում, իսկ միջպետական ճանապարհի սողանքից քանդված հատվածում լռություն էր: Հնարավոր չէ՞ր այդ 550 միլիոն դրամն ավելի շուտ հատկացնել, ներհամայնքային ճանապարհների ձմեռային ասֆալտապատումը միջպետական ճանապարհի վերականգնումից հրատա՞պ էր: Այրումի ճանապարհի փակ լինելու պատճառով Հայաստան բեռներ ներկրող խոշոր բեռնատարները ստիպված երթեւեկում են Նոյեմբերյան-Իջեւան ճանապարհով: 40-50 տոննա քաշով մեքենաների ճնշումից Լինսի հիմնադրամի միջոցներով կառուցված Նոյեմբերյան-Ջուջեւան, Ոսկեպար-Կիրանց հատվածներում, շատ տեղերում ասֆալտի ծածկույթը քանդվել է: Ճանապարհով երթեւեկությունն ապահովելու համար քանդված տեղերում խճաքար են փռել: Էդուարդ Բեզոյանը մեզ հավաստիացրել է, որ իրենք սողանքից քանդված ճանապարհի վերականգնումը կավարտեն նախատեսված ժամկետից՝ հուլիսի 16-ից շուտ: Սակայն կասկածելի է , որ մինչ հուլիսի 16-ը քանդված ճանապարհը վերականգնված լինի: Պետությունը փաստորեն 9 ամսում չկարողացավ վերականգնել Հայաստան-Վրաստան միջպետական ճանապարհի 350 մ հատվածը:
Ոսկան Սարգսյան
