«Քաղաքաշինության խորհրդի ճարտարապետների հանձնաժողովը մարտի 22-ին քննարկել է Նանսենի անվան զբոսայգում համանուն թանգարանի կառուցումը եւ ընդունել նախնական ծրագիր, ըստ որի՝ մեկ հարկանի թանգարանը կառուցվելու է այգու միջնամասում գտնվող բետոնապատ տարածքում՝ զբաղեցնելով 52 քմ տարածք»,-այսօր «Հայելի» ակումբում ասաց քաղաքապետարանի ներկայացուցիչ Արբակ Վարդանյանը: Նա հավելեց, որ կառուցումից հետո մշակութային օջախ հանդիսանալիք շինությունը հանձնվելու է քաղաքապետարանին՝ որպես թանգարան:
Բնապահպանների հայտնած մտահոգությունների շուրջ «Ֆիրտյոֆ Նանսեն» հիմնադրամի նախագահ Ֆելիքս Բախչինյանը վստահեցրեց, որ թանգարանը չի կառուցվելու կանաչ տարածքի հաշվին, եւ ոչ մի ծառ չի հատվելու. «Կառուցումը մտնում է 2010թ.-ին կառավարության Նանսենի հոբելյանական հանձնաժողովի ծրագրերի մեջ: Խոսակցություններն այն մասին, թե շենքը ունենալու է այլ գործածություն, պարզապես ասեկոսեներ են: Ես ինքս դեմ եմ ծառահատմանը, առանց այդ էլ շնչելու օդ չի մնացել, բայց տվյալ պարագայում մեծ աղմուկ է բարձրացրել բետոնի վրա կառուցվելիք փոքր շինությունը»: Պարոն Բախչինյանի խոսքով՝ թանգարան-ցուցասրահը կնպաստի երիտասարդության իրազեկման բարձրացմանը. «Երիտասարդների մեծ մասը չգիտի Նանսենի մասին, բայց թանգարանը կլինի մշակութային օջախ, որ կներկայացնի 20-րդ դարի մեծ մարդասերին: Հայ դատը պաշտպանած Նանսենն արժանի է թանգարան ունենալ: Լինելով Նոբելյան մրցանակակիր՝ նա փող էր մուրում եւ օգնում հայ գաղթականներին»:
Լուիզա ՍՈՒՔԻԱՍՅԱՆ
