Այսօր «Մարիոթ Արմենիա» հյուրանոցի «Տիգրան Մեծ» սրահում տեղի ունեցավ «Մասնագիտական կրթության հեռանկարները Հայաստանում» խորագրով խորհրդաժողով, որը կազմակերպել էր Գերմանիայի միջազգային համագործակցության ընկերությունը (ԳՄՀԸ-GIZ): Հանդիպման ընթացքում ամփոփվեցին «Դեպի զբաղվածությունը կողմնորոշված որակավորումը՝ Հայաստանի տնտեսական զարգացման առանցքային ոլորտներում» եռամյա ծրագրի արդյունքները: Ծրագրի համակարգող Յուլիա Ստակյանը լրագրողների հետ զրույցում նշեց, որ մասնագիտական կրթության ուսուցման ոլորտում առկա են բազմաթիվ խնդիրներ. «Առաջնայինը գործատուի եւ ուսումնական հաստատությունների միջեւ թույլ սոցիալական համագործակցությունն է: Ծրագրի շրջանակում պատրաստել ենք դասավանդողների համար նախատեսված ձեռնարկներ՝ կրթօջախների կառավարման եւ մասնագիտական մանկավարժության վերաբերյալ, որոնք նպաստելու են տեղում վերապատրաստմանը: Ստեղծվել է նաեւ միջին մասնագիտական կրթության ուսուցման էլեկտրոնային պորտալ, որը միավորում է ծրագրի մասնակիցներին Հայաստանից եւ Վրաստանից»: Հավելենք, որ եռամյակի ընթացքում վերապատրաստվել են դպրոցների 20 ղեկավար եւ 45 ուսուցիչ: Ծրագիրը ֆինանսավորել է Գերմանիայի Դաշնային Հանրապետության արտաքին գործերի նախարարությունը:
ՀՀ-ում Գերմանիայի արտակարգ եւ լիազոր դեսպան Հանս-Յոխեն Շմիդթը նշեց, որ առաջնահերթ պետք է խթանել գործնական մասնագիտական ուղղությունների զարգացումը, ինչը առիթ կհանդիսանա նաեւ տնտեսության զարգացման համար. «Գերմանիան, որպես հետպատերազմյան վերականգնված տնտեսություն ունեցող երկիր, պատրաստ է իր փորձը կիսել գործընկերների հետ: Միջին մասնագիտական կրթության զարգացումն իր հետ կստեղծի նոր աշխատատեղեր՝ ամրապնդելով բուհական համակարգը եւ լուծելով զբաղվածության խնդիրը»:
ԿԳ նախարարության արհեստագործական եւ միջին մասնագիտական կրթության վարչության պետ Ռոբերտ Աբրահամյանն ասաց, որ տնտեսական առաջընթացին զուգահեռ՝ կարեւոր է նաեւ միջին մասնագիտական կրթության զարգացումը. «Դա իրականացվում է ինչպես ԿԳ նախարարության, այնպես էլ համագործակցող կողմեր հանդիսացող միջազգային կազմակերպությունների օգնությամբ: Գործընթացը կատարվում է գործատուների ակտիվ մասնակցությամբ, քանի որ միջին մասնագիտական կրթություն ստացած շրջանավարտները իրենց գիտելիքներն ու կարողությունները ներդնում են տնտեսության տարբեր ոլորտներում»:
Կարդացեք նաև
ԿԳ փոխնախարար Կարինե Հարությունյանը նշեց, որ կրթության ոլորտի կարեւոր մասն են կազմում մասնագիտական կրթության ուսուցման բարեփոխումները. «Դրանք առավելագույնս պայմանավորված են Բոլոնիայի գործընթացով, որում Հայաստանը ներգրավված է 45 երկրի հետ: Այս տարվա հուլիսի 1-ից Հայաստանը 3 տարի ժամկետով ստանձնելու է Բոլոնիայի քարտուղարությունը, իսկ 2015թ.-ին հյուրընկալելու է անդամ երկրների կրթության նախարարների մասնակցությամբ գիտաժողովը»:
Լուիզա ՍՈՒՔԻԱՍՅԱՆ
