Այս տարվա հինգ ամիսների տվյալներով երթեւեկության կանոնների խախտումներից Ճանապարհային ոստիկանության արտաբյուջետային ֆոնդ մոտ 1 միլիարդ դրամ է մուտքագրվել: Aravot.am-ի հետ զրույցում այս մասին ասաց ՀՀ Ճանապարհային ոստիկանության ճանապարհապարեկային ծառայության բաժնի պետ Նորիկ Սարգսյանը:
Նա ասաց, որ այս տարվա առաջին հինգ ամիսների համեմատ նախորդ տարի գանձվող տուգանքներն ավելի շատ են եղել: Նա նաեւ հերքեց օրեր առաջ «Աքիլլես» ավտովարորդների իրավունքների պաշտպանության հ/կ նախագահ Էդուարդ Հովհաննիսյանի ասածները, թե հունիսի 2-ից որոշ իրավախախտումների դիմաց գանձվող տուգանքների չափերի բարձրացումը հենց Ճանապարհային ոստիկանության արտաբյուջետային ֆոնդը լցնելու նպատակով է արվել: Պարոն Սարգսյանը բացատրեց, թե ուր են գնում արտաբյուջետային ֆոնդ մտած գումարները: Նրա խոսքով , 1 միլիարդ դրամից առնվազն 70 տոկոսը ծախսվում է գծանշանների ու երթեւեկության կանոնների պահպանման համար անհրաժեշտ տեխնիկական սարքավորումների վրա. «Ճանապարհային ոստիկանության արտաբյուջեն գումար չի հավաքում ծախսելու կամ աշխատավարձ ստանալու համար, դրանից ընդամենը մի չնչին մաս առանձնացված է որպես աշխատավարձ` հավելավճարի կարգով ճանապարհային ոստիկանության անձնակազմին բաժանելու համար: Ճանապարհային ոստիկանության բոլոր աշխատողները հավելավճար են ստանում: Ի սկզբանե արտաբյուջետ ստեղծելու հիմքում դրված է եղել մի գաղափար` ճանապարհային ոստիկանին տալ հավելավճար, աստիճանաբար հասնել նրան, որ վարորդի հետ փոխհարաբերվելուց կոռուպցիոն ռիսկերից խուսափեն: Իսկ մնացած մեծ բաժինը տրամադրվում է զուտ երթեւեկության կարգավորման տեխնիակական միջոցները բարելավելու, նոր տեխնիկական միջոցներ ձեռք բերելու համար »:
https://www.youtube.com/watch?feature=player_embedded&v=dKgUC0q3_g4
Արփինե ՍԻՄՈՆՅԱՆ
