ՀԱԿ-ն ու «Ժառանգությունը» չեն հավանում այս կառավարության ծրագիրը
ՀԱԿ խմբակցության պատգամավոր, ՍԴՀԿ ատենապետ Լյուդմիլա Սարգսյանն Aravot.am-ի հետ զրույցում տեղեկացրեց, որ վաղը, մինչեւ ԱԺ նիստը, խմբակցության նիստում որոշում կկայացվի, թե ինչպե՞ս են արձագանքելու կառավարության ծրագրին: Ինքն անձամբ դեմ է քվեարկելու, քանի որ կարծում է, որ «դա որեւէ ակնկալիք չպարունակող» ծրագիր է եւ ոչ թե մարդու կյանքի բարելավմանն է ուղղված: Այն «ծրագիր է մարդու ականջների համար»: Հիշեցնենք, որ Հայ ազգային կոնգրեսը մինչեւ վարչապետի՝ քաղաքական ուժերի հետ կառավարության ծրագրի հիմնադրույթների քննարկումն էր դեմ արտահայտվել ներկայացվելիք ծրագրին: Իսկ ՀԱԿ խմբակցության պատգամավոր, նախկին վարչապետ Հրանտ Բագրատյանը հրապարակեց սեփական մոտեցումները:
«Ժառանգությունը» եւս դեմ քվեարկելու որոշում է կայացրել: Aravot.am-ի հետ զրույցում պատգամավոր Ռուբեն Հակոբյանը նաեւ տեղեկացրեց, որ իրենք առաջարկներ էլ են նախապատրաստել, որոնք կներկայացվեն քննարկումների ժամանակ: Կախված նրանից, թե կառավարությունն ինչպե՞ս կարձագանքի «Ժառանգության» առաջարկներին, հնարավոր է վերանայվի որոշումը: Նման զարգացումը, սակայն, մեր զրուցակիցը քիչ հավանական համարեց:
Նելլի ԳՐԻԳՈՐՅԱՆ
Կարդացեք նաև
