Լոռու մարզի ընդհանուր իրավասության դատարանը, նախագահությամբ դատավոր Աղասի Մկոյանի, այսօր Սպիտակի նստավայրում անհիմն լինելու հիմքով ամբողջությամբ մերժել է Վանաձորի պետական մանկավարժական ինստիտուտի նախկին դասախոս Լուսինե Աշուղյանի հայցադիմումն ընդդեմ նույն բուհի ստորաբաժանումների ղեկավարների:
Հայցվորը բուհի 17 դասախոսների մեղադրում էր իր պատիվը, արժանապատվությունը եւ գործարար համբավը արատավորելու մեջ:
«Լուսինե Աշուղյանին եւ նրա համախոհներին, ի գիտություն Լուսինե Աշուղյանի եւ նրա թիկունքում թաքնված բանսարկուների, ամբաստանությունների խոսափող, ուսանողական տարիներին չի փայլել գիտական աշխատանք կատարելու հակվածությամբ, անցած տարիների ընթացքում տպագրել է ընդամենը յոթ հոդված, դրսում տպված հոդվածները երեք էջից չեն անցնում, չգնահատված գիտնական, մի՞թե նրա տվյալներով մարդու համար բավական չէր լինի հենց գործակարգավարի պաշտոնը, որում, ի դեպ, նա ընդունվել է աշխատանքի», «արջին կամին չի կարելի լծել»,- այս եւ այլ արտահայտություններն էլ պատճառ էին դարձել նախկին դասախոսին դուրս գալու երբեմնի կոլեգաների դեմ:
Լուսինե Աշուղյանը մտադիր է դատավճիռը բողոքարկել վերադաս ատյաններ, հարկ եղած դեպքում իր բողոքով թակելու է Մարդու իրավունքների եվրոպական դատարանի դուռը:
Անուշ ԲՈՒԼՂԱԴԱՐՅԱՆ
