ՀՀ Լոռու մարզի ընդհանուր իրավասության դատարանը դատավոր Վարդուհի Հովնանյանի նախագահությամբ քննելով Լեռնապատի գյուղապետ Վանո Եղիազարյանի հայցն ընդդեմ լեռնապատցի Գեւորգ Մելքոնյանի, ինքնուրույն պահանջ չներկայացնող երրորդ անձ «Առավոտ» օրաթերթի՝ հունիսի 6-ին վճիռ է կայացրել: Մենք վճիռը ստանալուն պես հրապարակում ենք այն:
Ըստ այդ վճռի, կարճվեց հերթական քաղաքացիական գործի վարույթը.գյուղապետը հրաժարվել է հայցից:
Գյուղապետը վիճարկում էր պատվին, արժանապատվությանը եւ գործարար համբավին պատճառված վնասի հատուցման հարցը, եւ «Առավոտի» այն հոդվածը, որով ըստ նրա, պատասխանողը վիրավորել եւ զրպարտել էր իրեն:
Հայցվորը պահանջում էր 500 000 ՀՀ դրամ փոխհատուցում:
Կարդացեք նաև
Նշենք, որ խոսքը «Առավոտի» օգոստոսի 19-ի «Ով ում է զրպարտում» հրապարակման մասին է, որտեղ ներկայացված է ՀՀ կառավարության շենքի դիմաց կազմակերպված բողոքի ցույցը, եւ լեռնապատցիների՝ այդ կապակցությամբ հայտնված մտքերն ու կարծիքը: Միայն այդ հրապարակման կապակցությամբ, Լոռու մարզի ընդհանուր իրավասության դատարանում հայցվորը երեք տարբեր հայցեր էր ներկայացրել տարբեր դատարաններին:
Մեկ հայցով արդեն իսկ կար կարճման որոշում:
Այս դատաքննության ժամանակ «Առավոտի» ներկայացուցիչ, ՀՀ փաստաբանների պալատի անդամ Կարեն Թումանյանը գտել էր , որ հայցն ամբողջությամբ պիտի մերժել եւ բերել էր մարդու իրավունքների եւ հիմնարար ազատությունների մասին Եվրոպական կոնվենցիայի 10-րդ հոդվածը, համաձայն որի, յուրաքանչյուր ոք ունի ազատորեն արտահայտվելու իրավունք:
«Վանո Եղիազարյանը հանդիսանում է տեղական ինքնակառավարման մակարդակում առաջնային մանդատ կրող պաշտոնյա, քանի որ զբաղեցնում է ընտրովի պաշտոն:Այդ ենթադրում է, որ նույն համայնքի բնակիչները, ինչպես նաեւ լրատվամիջոցները կարող են ազատորեն քննադատել նրան եւ ընտրովի պաշտոնյան պետք է հանդուրժող լինի» ասում է «Առավոտի» ներկայացուցիչ, փաստաբան Կարեն Թումանյանը:
«Առավոտի» ներկայացուցիչը նաեւ հղում էր արել «Թյոգեր Թյորգեսոնն ընդդեմ Իսլանդիայի», «Դե Հալեսը եւ Գիյսելան Բելգիայի» գործերին: Ըստ առաջին գործի, գանգատաբերը գրող էր , դատապարտվել էր ոստիկանության աշխատակիցների կողմից քաղաքացիների նկատմամբ կիրառված բռնությունների մասին երկու հրապարակումների համար, որը ազգային անվտանգության մարմինները համարել էին «սադիստական»:Իսկ «համազգեստով գազարներ» որակումները դիտել էին վիրավորական, «անհարգալից ոճ»:
Ռուզան ՄԻՆԱՍՅԱՆ
