«Հարսնաքարում» դաժան ծեծի ենթարկված զինվորական բժիշկ, ԼՈՌ բաժանմունքի ղեկավար, մայոր Վահե Ավետյանին այս գիշեր եւս մեկ անգամ վիրահատել են: Այս մասին այսօր Aravot.am-ին ասաց Մուրացանի ռազմաբժշկական հոսպիտալի վերակենդանացման բաժնի պետ, բուժծառայության փոխգնդապետ Հայկ Անտոնյանը: Նրա խոսքերով` «Այս գիշեր ավելի մեծ ծավալով վիրահատություն ենք կատարել` մնացորդային օջախները մաքրվել են: Սակայն Վահեի վիճակը մնում է ծայրահեղ ծանր»:
Իսկ մյուս տուժածի` պաշտպանության նախարարության կապիտան, զինվորական հոսպիտալի նեյրովիրաբուժության բաժանմունքի միկրովիրաբույժ Արտակ Բայադյանի առողջական վիճակն էլ մնում է կայուն ծանր:
Կարդացեք նաև
Բժիշկ Հայկ Անտոնյանի փոխանցմամբ, նախօրեին «Հարսնաքարի» դեպքերի հետ կապված, այսօր եւս մեկ տուժած է ավելացել`կլինիկական օրդինատոր, ավագ լեյտենանտ Գարիկ Սողոմոնյանը, որը հենց առաջին օրը ուղղակի տուն է գնացել, չի դիմել բժշկի, սակայն այսօր պարզվել է, որ նա ուղեղի շատ ուժեղ ցնցում է ստացել:
ՀՀ պաշտպանության նախարարությունից Aravot.am-ին տեղեկացրին, որ գործը ոստիկանությունից տեղափոխվել է ՊՆ քննչական ծառայություն:
Հիշեցնենք, որ դեպքը տեղի է ունեցել հունիսի 17-ին, ԱԺ պատգամավոր Ռուբեն Հայրապետյանին պատկանող «Հարսնաքար» ռեստորանային համալիրում, որի անվտանգության աշխատակիցները բժիշկներին դաժան ծեծի են ենթարկել` սպորտային հագուստով ռեստորան մտնելու համար:
Նելլի ԲԱԲԱՅԱՆ
