Նորընտիր Ազգային ժողովում Շիրակի մարզից ընտրված սակավաթիվ պատգամավորների թիվը այսօր համալրվեց ևս մեկով. խորհրդարան մտավ նաև ՕԵԿ-ական Հովհաննես Մարգարյանը:
Հիշեցնենք, որ նա մեծամասնական ընտրակարգով Աշոցքի, Ամասիայի գյուղերն ու Գյումրու կենտրոնը ընդգրկող թիվ 33 ընտրատարածքում պայքարի էր դուրս եկել ՀՀԿ-ական Աշոտ Աղաբաբյանի դեմ, սակայն պարտվելով, խորհրդարան մտավ ՕԵԿ-ի համամասնական ցուցակով:
2009-2010 թվականներին անցկացված մոնիթորինգի արդյուքներով ամենաակտիվ պատգամավոր ճանաչված Հովհաննես Մարգարյանը արդեն երրորդ անգամն է խորհրդարան մտնում: Քիչ առաջ Aravot.am-ի հետ զրույցում նորընտիր պատգամավորն ասաց. «Վստահության համար անչափ շնորհակալ եմ իմ ընտրողներից, ՕԵԿ առաջնորդից ու կուսակցականներից, հերթական անգամ աղետի գոտին իր ներկայացուցիչը ունեցավ խորհրդարանում: Ու չնայած որոշ էժանագին գրչակներ փորձում են էժանագին հոդվածներ տպագրել այն մասին, որ ՕԵԿ-ում աճուրդով են պաշտոնի հասնում ` գործադիր, թե օրենսդիր, իրականությունը ցույց է տալիս, որ ՕԵԿ-ը այն քաղաքական ուժն է, Արթուր Բաղդասարյանն էլ այն առաջնորդն է, ով մշտապես ապացուցել է, որ իր որոշումները արդար են, անկաշառ` և մարդկային, և բարոյականության առումով: Առաջին պլան մղվում է կուսակցականի աշխատանքը թիմային պայքարում: Չնայած կուսակցությունը փոքրաթիվ է, բայց ամեն ինչ արեց Գյումրիից պատգամավոր ունենալու համար: Այստեղ վաստակը երբեք աճուրդով չի գնվում, ես պատգամավոր եմ դարձել առանց քոռ կոպեկի»:
Կարդացեք նաև
Կենտրոնական ընտրական հանձնաժողովը պատգամավորին հանձնեց նրա մանդատը:
Նունե ԱՐԵՎՇԱՏՅԱՆ
