Ամռանը պետք է ձմեռային սննդակարգը մոռանալ, չալաղաջներից ու կրեմով խմորեղեններից ցանկալի է մի քիչ հեռու մնալ: Այսօր «Հենարան» ակումբում խորհուրդ տվեց հանրապետության գլխավոր ինֆեկցիոնիստ Արա Ասոյանը եւ ավելացրեց` ամեն երեկոյան այդ հրաշագործ մածունը խմեք:
Նրա խոսքերով` եթե մարդիկ ճիշտ սնվեն, հետեւեն սննդի պիտանիության ժամկետին, թունավորումներ չեն լինի:
Արա Ասոյանը հորդորեց բացօթյա սննդի կետերից խուսափել, եւ հատկապես պայքարել խանութների այն վաճառողուհիների դեմ, որոնք հիգիենայի կանոնները չեն պահպանում. «Բացի սուպերմարկետներից, մնացած շատ խանութներում, ցանկացած սննդատեսակ… այդ վաճառողուհիները մի հատ մատը լավ թքում են, հետո ձեր գնած հացը կամ երշիկը դնում են տոպրակի մեջ: Ինչո՞ւ չեք ըմբոստանում դրա դեմ, պահանջեք կողքը դնի թրջած սպունգ, որ մարտը այնտեղ թրջի, ոչ թե թքի: Զարմանում եմ, տարբեր շուկաներում, Վերնիսաժում անհասկանալի կանայք` այդ պոդնոսներով, խմորեղեն են վաճառում ճանճերի հետ միասին: Ոստիկանական մեթոդներ պետք չեն, պարզապես պետք չէ գնել այդ սննդամթերքը»:
Մեր հարցին, արդյոք սննդի բացօթյա առեւտրի վերահսկողությունը ուժեղացնելու կարիք չունի՞, պարոն Ասոյանը վստահեցրեց` սննդի անվտանգության ծառայությունը շատ էլ լավ է աշխատում.« Եթե վատ աշխատեր, մեր հիվանդանոցում այսօր 5-10 հազար հիվանդ կլիներ` թունավորումով: Այսօր նման ոչ մի դեպք չունենք»:
Կարդացեք նաև
Բժիշկը նաեւ խորհուրդ տվեց մաքուր շշալցված ջուր խմել, օրական առնվազն 1-1.5 լիտր, բայց հանքային ջուր աշխատել չխմել: Հարցին էլ՝ գազավորված ըմպելիքներից կոկա-կոլա՞ էլ չխմել, պարոն Ասոյանը դեռ մի բան էլ խորհուրդ տվեց հետեւել այն երկրներին, որտեղ մեծ քանակությամբ կոլա են օգտագործում. «Թող խմեն, ճաշակից է… ամբողջ աշխարհը խմում է, մենք էլ խմենք, ինչո՞ւ չէ, դրանից թունավորում չենք ունեցել»: Մեր դիտարկմանն էլ, որ ամբողջ աշխարհում նաեւ պայքարում են դրա դեմ, քանի քիմիական նյութեր է պարունակում եւ արդեն ապացուցված է, որ առողջությանը վնասակար է, հանրապետության գլխավոր ինֆեկցիոնիստն ասաց. «Մենք էլ ենք պայքարում…վնասակարությունը առանձին թեմա է, ինձ չի վերաբերում: Համենայնդեպս ամբողջ աշխարհը խմում է, թող խմեն չափավոր, ես ինքս մեր մրգայինն եմ գերադասում»:
Նելլի ԲԱԲԱՅԱՆ
