«Ինչի՞ եք զարմանում, Քլինթոնը գովեց նախագահին, դեսպանն էլ վարչապետին պետք է գովի»,- երեկ «Առավոտի» հարցին ի պատասխան՝ ասաց ՀԴԿ նախագահ Արամ Սարգսյանը: Հիշեցնենք, որ նախօրեին ի պատասխան Հանրային հեռուստաընկերության այն հարցին, թե ինչ կարծիքի է ՀՀ-ում ԱՄՆ դեսպան Ջոն Հեֆերնը Տիգրան Սարգսյանի վերանշանակման վերաբերյալ, դեսպանն ասել էր. «Մենք ոգեւորված ենք: Նա եղել է եւ կմնա Ամերիկայի Միացյալ Նահանգների եւ միջազգային հանրության շատ լավ գործընկերը: Ակնհայտ է, որ նա տնտեսագիտական ճիշտ փորձառություն ունի Կենտրոնական բանկում աշխատած տարիներից: Մենք ոգեւորված ենք: Անշուշտ, ով էլ նշանակվեր վարչապետ, մենք նրա հետ աշխատելու էինք, բայց մենք ողջունում ենք վարչապետ հենց Տիգրան Սարգսյանի վերանշանակումը եւ իրոք անհամբեր սպասում ենք նրա հետ առաջիկայում աշխատելուն»:
Արամ Սարգսյանից հետաքրքրվեցինք նաեւ՝ ինչպե՞ս է վերաբերվում նոր կառավարության կազմին: Վերջինս նշանակումներից առանձնապես սպասելիքներ չուներ, առավել եւս, որ կառավարության հիմնական կազմը պահպանվել է: Նաեւ՝ իր համար սկզբունքայինը ոչ թե անձերն են, այլ համակարգը. «Այս անհատական մոտեցումները մեր կուսակցության համար որեւէ նշանակություն չունեն, որովհետեւ խոսքն այն մասին է՝ համակարգ փոխելո՞ւ են, թե՞ ոչ»: Նոր կառավարության, նոր ծրագրի մասին դեմոկրատները կարծիք կհայտնեն այն լավ ուսումնասիրելուց հետո: Միայն գերակա ընտրված ուղղություններից եւ այս իրավիճակը փոխելու մոտեցումները ուսումնասիրելուց հետո Արամ Սարգսյանը կքննարկի նշանակված նախարարներին՝ կարո՞ղ են այդ անձինք այդ ամենն անել, թե՞ ոչ:
Ինչեւէ, նախարարական նշանակումներում մեր զրուցակիցը «արտառոց» ոչինչ չի տեսնում: Իսկ առողջապահության նախարար Դերենիկ Դումանյանին անգամ «լավ կազմակերպիչ» է համարում:
«Առավոտ» օրաթերթ
