Հատված ԼՂՀ ԱԺ արտաքին հարաբերությունների հանձնաժողովի նախագահ Վահրամ Աթանեսյանի հարցազրույցից:
–Ահարոն Ադիբեկյանի հրապարակած տվյալների համաձայն՝ Ղարաբաղյան հիմնախնդրի կարգավորման հարցում Բակո Սահակյանին վստահող քաղաքացիների թիվը փոքր–ինչ նվազել է՝ մեկնարկային 33 տոկոսից իջել է 26-ի։ Կա՞ այդպիսի երեւույթ։
-Չեմ կարծում, թե կարելի է 900 մարդու կարծիքի հիման վրա նման եզրահանգումներ անել։ Սա՝ մեկ։
Երկրորդ՝ չէի ասի, թե հարցումները, մասնավորապես այդ կտրվածքով, արտացոլում են իրականությունը։ Ո՛չ։ ԼՂՀ նախագահի նկատմամբ վստահությունը շատ բարձր է, այդ թվում՝ Ղարաբաղյան հիմնախնդրի կարգավորման հարցում։ Պատահական չէ, որ ՀՅԴ Արցախի կոմիտեն էլ գործող նախագահի թեկնածությունը պաշտպանելու մասին իր հայտարարության մեջ հիմնական շեշտը դրել է վերջին 5 տարիներին իրականացվող արտաքին քաղաքականության վրա։
Այս ընթացքում ՀՆԱ-ի ցուցանիշը 2,5 անգամ ավելացել է, բյուջեն՝ կրկնապատկվել, եկամտային մասն աճել է 5 անգամ, կտրուկ փոխվել է ժողովրդագրական իրավիճակը՝ ԼՂՀ-ից բնակչության արտահոսք չկա։ Ժամանողների եւ մեկնողների տարբերությունը դրական է՝ արձանագրվել է բնակչության դինամիկ աճ. բնակչության թիվը ամեն տարի ավելացել է ավելի քան 1000-ով։
Այս պայմաններում, երբ նախագահ Բակո Սահակյանը միանշանակ հայտարարություններ է անում խնդրի կարգավորման վերաբերյալ՝ ասելով, որ հարցը կարող է լուծվել միայն այն դեպքում, երբ Արցախը դառնա լիարժեք բանակցային կողմ, երբ մայիսի 3-ին Ստեփանակերտում անցկացվում է աննախադեպ զորահանդես, երբ ԼՂՀ նախագահը մշտապես լինում է զորամասերում, սահմանամերձ գյուղերում եւ գյուղական բնակավայրերում, ասել, որ նախագահի վարկանիշը թեկուզ կես տոկոսով նվազել է՝ սա ինձ համար, մեղմ ասած, անհասկանալի է։
Լիլիթ ՊՈՂՈՍՅԱՆ
«Հայոց աշխարհ»
