Այսօր մաթեմատիկա առարկայի քննության արդյունքների բողոքարկման օրն էր: ԵՊՀ-ում բողոքարկել է 3 դիմորդ՝ խնդրելով վերահաշվարկ անել: Բոլորի դիմումներն էլ ընդունվել են:
Երեւանի թիվ 14 հիմնական դպրոցում ձեւավորված քննակենտրոնում բողոքարկել է 7 դիմորդ: Նրանք խնդրել են օպերատորին միասին վերահաշվարկ անել՝ ներկայացնելով իրենց ձեւաթղթերը: Նրանցից 4-ը համոզվել է, որ ճիշտ են հաշվարկված միավորները, 3-ը ամեն դեպքում բողոքարկել է:
Արդեն հայտնի է նաեւ մաթեմատիկա առարկայի քննության միջին միավորը: Հիշեցնենք, որ դիմում- հայտ էր ներկայացրել 8957 դիմորդ, բացակայել՝ 359-ը:
Ի դեպ, ինչպես Aravot.am-ին տեղեկացրեց Գնահատման եւ թեստավորման կենտրոնի մամուլի պատասխանատու Գայանե Մանուկյանը, մաթեմատիկայի միջին միավորը 11,6 է, սա այն դեպքում, երբ 2011-ին՝ 6,02 էր, 2010-ին՝ 10,3, իսկ 2009-ին՝ 10,8:
Կարդացեք նաև
Մաթեմատիկայից 17,5-20 միավոր է ստացել 747 դիմորդ, որոնցից 77-ը՝ լիարժեք 20 միավոր, 13,5-17,25 է վաստակել մաթեմատիկա հանձնած 2177 դիմորդ: 7,5-13,25 ստացել է 4338 մարդ, դրական միավորի շեմը չի հաղթահարել 1336 դիմորդ, որը կազմում է 15,5 %:
Գոհար ՀԱԿՈԲՅԱՆ
