Ելույթ է ունենում Ալի Աբասովը
Հունիսի 16-ին Վրաստանի Մառնեուլի շրջանի Թեքալի գյուղում կայացած «Հայ-ադրբեջանական սահմանագոտում հրադադարի ռեժիմի խախտումներ, իրակա՞ն է արդյոք հասարակական միջամտությունը» թեմայով հասարակական լսումների ժամանակ որպես փորձագետ ելույթ ունեցավ նաեւ Ադրբեջանի գիտությունների ակադեմիայի աշխատակից Ալի Աբասովը: Նա քննարկվող թեմայի վերաբերյալ ասաց. «Ցավոք,Ադրբեջանի եւ Հայաստանի քաղաքացիական հասարակությունները ոչինչ չեն ձեռնարկել հայ-ադրբեջանական սահմանագոտում հրադադարի ռեժիմի խախտումները բացառելու համար: Նույնիսկ հակամարտության միջնորդներն են համարում, որ ղարաբաղյան հակամարտության բանակցային գործընթացում եւ հակամարտության հետ կապված հարցերի լուծման գործում քաղաքացիական հասարակությունները տեղ չունեն: Բայց իրականում այդպես չէ, վճռական պահին քաղաքացիական հասարակությունը կարող է եւ պետք է այդ հարցի վերաբերյալ իր կարծիքը հայտնի: Ինչ վերաբերում է հրադադարի ռեժիմի խախտումներին, այստեղ հիմնականը հումանիտար խնդիրն է: Այն ինչ տեղի է ունենում՝ գնդակոծություններ, մարդկանց սպանություններ, դա մահապատժի, մարդու ոչնչացման ձեւ է, այն դեպքում, երբ մարդկությունը բազմաթիվ փաստաթղթեր, զանազան օրենքներ, հռչակագրեր է ընդունել մարդկության դեմ հանցագործությունների համար հետապնդման համար: Այդ գնդակոծությունների մեջ ոչ մի տրամաբանություն չկա»:
Ալի Աբասովը, որպես դրական օրինակ, հիշեցրեց, որ ժամականին հակահետեւակային ականների տարածման դեմ շարժում կար, որը դարձավ Խաղաղության Նոբելյան մրցանակի կոլեկտիվ դափնեկիր: Նա ասաց, որ իրավիճակն նման է, որ երկու դեպքում էլ տուժում են ոչ միայն զինվորականներ, այլ նաեւ ՝ քաղաքացիական անձինք:
Նրա կարծիքով՝ հարկավոր է միջազգային կազմակերպություն ստեղծել, որի մեջ ընդգրկվեն համաշխարհային մակարդակով կշիռ ունեցող իրավապաշտպաններ, հասարակության ներկայացուցիչներ, նաեւ այդ հարցերով զբաղվող պետական որոշ կառույցների ներկայացուցիչներ: Այդ կազմակերպությունը ի սկզբանե պետք է հանդես գա հայտարարությամբ, որտեղ պետք է արտացոլվեն խնդրի հետ կապված իրավական եւ հումանիտար սկզբունքները:
Ադրբեջանցի գիտնականը հայտարարեց. «Կրակում են ոչ թե ինչ-որ մարդկանց, այլ մեզ վրա, կարող են սպանել մեզ, մեր երեխային, մեր հարազատին, դա կենսականորեն կարեւոր խնդիր է, եթե քաղաքացիական հասարակությունը պետք է լռի նման վանդալիզմի եւ բարբարոսության մասին, ես չգիտեմ, թե ինչ ասել…»:
Կարդացեք նաև
Ոսկան ՍԱՐԳՍՅԱՆ
