Կառավարության որոշմամբ, հունիսից երթեւեկության կանոնները խախտելու համար նախատեսված տուգանքների չափը բարձրացել է: «Գտնում ենք, որ Ճանապարհային ոստիկանության խնդիրը գումարներ հավաքելն է, այդ խախտումների գումարները մուտքագրվում են արտաբյուջետային ֆոնդ, ոչ թե պետբյուջե եւ այդ ֆոնդը տիրապետում է Ճանապարհային ոստիկանությունը»,- այսօր «Արմատ» ակումբում ասուլիսի ժամանակ ասաց «Աքիլլես» ավտովարորդների պաշտպանության հ/կ նախագահ Էդուարդ Հովհաննիսյանը:
Նա չի հավատում տուգանքների չափը բարձրացնելու վերաբերյալ Ճանապարհային ոստիկանության բացատրությանը, թե ճանապարհային երթեւեկության անվտանգության բարձրացման ու կարգ ու կանոնի հաստատման համար են արել: Վարորդների պաշտպանը գտնում է, որ տեսախցիկների տեղադրման շնորհիվ կարգ ու կանոնն արդեն հաստատված էր .«Տեսախցիկների հաշիվն արդեն կորել է, որովհետեւ դրանց թիվն անցել է 50- 60: Համենայնդեպս այս տարի նախատեսել էին 90-ի հասցնել տեսախցիկների թիվը»:
«Աքիլլեսին» դիմող վարորդների ահազանգերն էլ են շատացել, պարոն Հովհաննիսյանի խոսքերով, մոտ 30 դիմում միայն Ռուբինյանց փողոցին են վերաբերում: Այդ հատվածում Ճանապարհային ոստիկանությունը փոխել է թույլատրելի արագության չափը, իսկ նոր նշանը տեղադրել վարորդներին ոչ տեսանելի վայրում. «Տեսախցիկը խախտումներ է, որ ֆիքսում է»:
Վերջին մեկ ամսվա ընթացքում , «Աքիլլեսը» արձանագրել է նաեւ կաշառքի դեպքեր.«Աքիլլեսին» վարորդներն այդ մասին անձամբ են ահազանգում ու խոստովանում.«Երբ վարորդը տեսնում է, որ խախտման համար տեսուչը ինչ-որ մեծ գումար է ասում ու առաջարկում է՝ այսքան գումար տուր գնա, վարորդն էլ կաշառքը տալիս ու դեպքի վայրից հեռանում է»:
Կարդացեք նաև
Արփինե ՍԻՄՈՆՅԱՆ
