«Ժառանգություն» կուսակցության վարչության փոխնախագահ Արմեն Մարտիրոսյանի գնահատմամբ՝ Վարդան Օսկանյանին առնչվող մեղադրանքներում առկա է եւ քաղաքական, եւ իրավական հետագիծ: Իսկ ՀՀԿ խորհրդի անդամ, ԱԺ կրթության, գիտության եւ մշակույթի հարցերով մշտական հանձնաժողովի նախագահ Արտակ Դավթյանի կարծիքով՝ առանց որոշակի փաստերի հնարավոր չէ մարդու «գլխին սարքել»:
«Առավոտ»– Պարոն Մարտիրոսյան, Ձեր գնահատմամբ՝ արդյոք քաղաքական պատվերների, ռեպրեսիաների եւ հետապնդումների ժամանակներն անցյալո՞ւմ են, ինչպես պնդում են Հանրապետական կուսակցության ներկայացուցիչները:
Արմեն Մարտիրոսյան– Իհարկե, ցանկալի կլիներ, որ այդպես լիներ, սակայն Վարդան Օսկանյանի պարագայում մի փոքր քաղաքական ենթատեքստ, այնուամենայնիվ, ես տեսնում եմ՝ հաշվի առնելով նաեւ այն հանգամանքը, որ այդ փաստերը ԱԱԾ-ին շատ ավելի վաղ են հայտնի եղել, սակայն քրեական գործի հարուցումը համընկել է ԲՀԿ-ի՝ կոալիցիա չմտնելու որոշման հետ: Ուստի այս առումով որոշակի ենթատեքստ կա. ոչ թե ինչ-որ բան, որ չի եղել, եւ նոր հիմա բացահայտում են, ոչ, եղել է դրվագը, ուղղակի այդ ժամանակահատվածում պետք չի եղել բացահայտել՝ չեն բացահայտել:
Կարդացեք նաև
«Առավոտ»– Այսինքն՝ Դուք պնդում եք, որ իրո՞ք եղել է նման դրվագ, որտեղի՞ց եք տեղյակ, որ իրոք եղել է այդպիսի բան:
Ա. Մարտիրոսյան– Դե, ԱԱԾ-ն հայտարարություն տարածեց, որտեղ եւ գումարի աղբյուրի, եւ չափի մասին է խոսում: Իհարկե, սա կարծես թե փողերի լվացում չէ, ավելի շուտ երեւի հարկային պարտավորություններից խուսափում է: Ցանկացած պարագայում, այս գործի հարուցման ժամանակային առումով ես որոշակի քաղաքական հետագիծ տեսնում եմ: Բայց կարծեք թե իրավականն էլ կա, որովհետեւ ԱԱԾ տարածած երկու հայտարարությունների մեջ արդեն նաեւ փաստերի մասին է խոսվում:
Արտակ Դավթյան- Երբ քաղաքական գործիչների նկատմամբ այս կամ այն տիպի մեղադրանքներ են ի հայտ գալիս, ապա ամենահեշտ ճանապարհը հարցը միանգամից քաղաքականացնելն է եւ որպես քաղաքական պատվեր ներկայացնելը:
«Առավոտ»– Սակայն արդյոք հենց այս փուլում քրեական գործ հարուցելով՝ իշխանությունները լրացուցիչ հնարավորություն չե՞ն տալիս կոնկրետ Վարդան Օսկանյանին նման պնդումներ անելու: Ի վերջո, ինչո՞ւ հենց հիմա հարուցվեց այդ գործը:
Ա. Դավթյան– Եթե այն փաստերը, որոնք ներկայացրել է ԱԱԾ-ն, հաստատվեն, ապա այդ գործընթացը ենթադրում է, որ Ազգային ժողովում եւս պետք է քննարկվի: Ես ասել եմ եւ կրկնում եմ՝ շատ ցավում եմ, որ այսպիսի դեպք, այսպիսի փաստ կա, քանի որ անկախ ամեն ինչից՝ Վարդան Օսկանյանը 10 տարի ղեկավարել է մեր երկրի արտգործնախարարությունը եւ նաեւ բավականին ծառայություններ է մատուցել մեր երկրին: Եվ երբ ասում եք՝ այդ երեւույթները, այդ փաստերն ավելի վաղ կային, ինչո՞ւ հիմա արվեց, ապա ես կարծում եմ, որ այնպիսի պետական այրի դեպքում, ինչպիսին Վարդան Օսկանյանն է, այդ փաստերը պետք է տասնյակ անգամներ ճշգրտվեին եւ հետո նոր միայն ներկայացվեին. այն, ինչը որ կատարվել է: Ամեն դեպքում, գոյություն ունի անմեղության կանխավարկած, բայց նաեւ գոյություն ունի փաստ, ուզում ենք, թե ոչ՝ ԱԱԾ-ն ներկայացնում է կոնկրետ իր դիրքորոշումն ու փաստարկները: Ես շատ կցանկանայի, որ քննության ընթացքում դրանք հերքվեին:
Ա. Մարտիրոսյան– Ինձ, որպես քաղաքական գործչի, խիստ անհրաժեշտ է, որ Վարդան Օսկանյանը ԱԱԾ ներկայացրած փաստերը ժխտի: Ինչպես ինքը հրապարակավ ասում է՝ այս-այս գումարներն այստեղից են եղել, նույնկերպ եւ հրապարակավ ժխտի, որ այդ փոխանցումն իրեն եղել է, որ «Սիվիլիթասն» այդ գումարն օգտագործել է, որ իր եւ Տիգրան Կարապետյանի անձնական հաշիվներին այդ գումարները նստել են եւ այլն: Սակայն եթե խոսում ենք խնդրի քաղաքական կողմի մասին, ապա պետք է նշեմ, որ Վարդան Օսկանյանն այսօր հնձում է այն, ինչն ինքը տարիներ շարունակ ցանել է. չմոռանանք, որ Ալեքսանդր Արզումանյանը ընդամենը մի քանի տասնյակ հազար դոլարի համար 6 ամիս հայտնվեց անազատության մեջ: Այ, դա իսկական, հստակ քաղաքական հետապնդում էր, ռեպրեսիա էր արդեն, երբ մարդուն ազատությունից զրկեցին: Այս պահին պարոն Օսկանյանին ոչ ոք ազատությունից չի զրկել, հույս ունենանք, որ հետագայում եւս նա կլինի ազատության մեջ: Սակայն ինձ համար միանշանակ է, որ այն համակարգը որը տարիների ընթացքում ստեղծվել է, բումերանգի նման գալիս-հարվածում է իր ստեղծողներին: Ըստ էության, փողերի լվացման մեղադրանքներով նախկին պաշտոնյաներին ճնշելու մեխանիզմը առաջին անգամ ներդրվեց Ռոբերտ Քոչարյանի եւ Վարդան Օսկանյանի ժամանակ: Եվ հիմա Օսկանյանը կանգնում է նույն խնդրի առջեւ, մինչդեռ ես համոզված եմ, որ Ալեքսանդր Արզումանյանի դեպքում Օսկանյանը տարբեր երկրների ներկայացուցիչների համոզել է, որ Արզումանյանի հանդեպ քաղաքական հետապնդում չկա:
«Առավոտ»– Վարդան Օսկանյանը հայտարարեց, որ թեեւ ինքը հրապարակային հակազդեցություն ցույց չի տվել, սակայն ինչ-որ պետք է՝ասել է՝ կապված Արզումանյանի ազատազրկման հետ:
Ա. Մարտիրոսյան- Դա բացառվում է: Թե նա ինչ է շշնջացել Ռոբերտ Քոչարյանի ականջին՝թողնենք այդ երկուսին, բայց ես համոզված եմ, որ Օսկանյանն արդարացրել է Արզումանյանի հանդեպ եղածը:
«Առավոտ»– Պարոն Դավթյան, ինչպե՞ս եք գնահատում նախկին ոստիկանապետ, ներկայումս ՀՀ նախագահի խորհրդական Ալիկ Սարգսյանի՝ նախօրեին արած հայտարարությունը, թե. «Դուք տեսնում եք՝ ինչպիսի ժամանակներ են, օդի մեջ մարդու գլխին մի բան են սարքում, անպայման ուզում են մի բան մոգոնել»: Որքանո՞վ է Ձեր կուսակցական ընկերոջ հնչեցրած այս միտքը տեղավորվում հետապնդումների ու պատվերների՝ անցյալում մնացած լինելու մասին ՀՀԿ հայտարարության մեջ:
Ա. Դավթյան– Նախ՝ օդում որեւիցե բան չի սարքվում, իմ կողմից ամբողջովին նման բան բացառվում է, ես ուղղակի չեմ ընդունում այն տեսակետը, որ առանց որոշակի փաստարկների հնարավոր լինի մարդու գլխին այդ սարքել ասվածը իրականացնել: Եվ եթե նախկին իշխանավորները նման տեսակետներ են արտահայտում, ապա նրանք գոնե պետք է համարձակություն ունենան նշելու իրենց իշխանության տարիների որոշակի արատները: Եվ այսօրվա որոշակի արատավոր երեւույթների սկզբնաղբյուրները նաեւ նրանց նախկին գործունեության մեջ են:
«Առավոտ»- Իսկ Դուք այդ հարցը քննարկե՞լ եք Ալիկ Սարգսյանի հետ:
Ա. Դավթյան– Ոչ, չեմ քննարկել:
Բանավեճը վարեց ԱՐԵՎԻԿ ՍԱՀԱԿՅԱՆԸ
Նախագիծն իրականացվում է «Բաց հասարակության հիմնադրամներ-Հայաստան» ծրագրի շրջանակներում:
Քաղաքական գործիչների ԴԵՄ ԱՌ ԴԵՄ բանավեճն ամբողջությամբ
