Aravot.am-ն այսօր այցելեց Մխիթար Հերացու անվան պետական բժշկական համալսարանում ձեւավորված քննական կենտրոն, որտեղ անգլերենի միասնական քննություն էր: Պատասխանատուները դիմորդներին նախ ծանոթացրին անցկացման կարգին, զգուշացրին, որ արտագրելու դեպքում կհեռացվեն, ապա տեղեկացրին` քննությունը կտեւի 2 ու կես ժամ:
Ձեւաթղթի գլխամասը կտրելուց հետո, Բժշկական համալսարանում ձեւավորված քննակենտրոնի ղեկավար Գուրգեն Խաչատրյանը տվեց քննության մեկնարկը: Կանչվեց մի քանի ծնող ու դիմորդ, որպեսզի հենց իրենք բացեն ծրարները` հավաստիանալու, որ ամեն ինչ արդար է : Դրանից հետո պատասխանատուները բաժանեցին միասնական քննության թեստերը, եւ դիմորդները սկսեցին աշխատել: Քննությանը ներկա էր 192 դիմորդ, բացակայում էր 7-ը:
Զրուցեցինք քննություն հանձնողների հետ:
Դիմորդներից Անժելան ցանկանում է ընդունվել Ագրարային համալսարան: Մինչեւ հիմա եղած քննությունները հաջող է հանձնել, իսկ անգլերենին, իր կարծիքով, լավ է պատրաստվել:
Համալսարանի բակում դրված էր մոնիտոր, որի միջոցով ծնողները կարող էին տեսնել ներսում գտնվող իրենց երեխաներին:
Քննության մեկնարկից մեկ ժամ հետո դուրս եկավ մի աղջիկ՝ Մարիամ Ռոստոմյան անունով: Նա Aravot.am-ին ասաց, որ ընդունվել է գեղարվեստի ակադեմիա, ուղղակի իր ցանկությամբ եկել էր անգլերեն հանձնելու՝ ուժերը փորձելու համար, թեեւ այդ գնահատականը իրեն պետք չի գալու:
Արամ ԱՐԱՐԱՏՅԱՆ
Կարդացեք նաև
