Այսօր Արամի 64 հասցեում տեղի ունեցավ անվանի կինոռեժիսոր Գենադի Մելքոնյանի հիշատակին նվիրված հուշատախտակի բացման արարողությունը, որին ներկա էին կինոռեժիսորի ընտանիքի անդամները, բարեկամները եւ գործընկերները: Գ. Մելքոնյանի համակուրսեցի, դերասան Ազատ Գասպարյանը վերհիշեց ուսանողական տարիները. «Գենան մեր կուրսի սիրելին էր: Այս տունը կարծես վերնատուն է եղել ժամանակի կինեմատոգրաֆիստների, նկարիչների եւ ռեժիսորների համար, ովքեր հավաքվում էին եւ բանավիճում: Գենան ազնվական էր ամեն հարցում»:
Կինեմատոգրաֆիստների միության նախագահ Ռուբեն Գեւորգյանցը նշեց, որ Գ. Մելքոնյանն ապրում է իր «Թթենիով», քանի դեռ հիշում ենք նրան. «Այդ ֆիլմի գաղափարը հենց Գենադիի գաղափարն է՝ բարիություն, լիություն, համերաշխություն»:
Հայաստանի ազգային կինոկենտրոնի տնօրեն Գեւորգ Գեւորգյանը փաստեց, որ Գ. Մելքոնյանն ապրեց կարճ, բայց բեղմնավոր կյանք. «Նրա ստեղծագործական աշխատանքի մասին բոլորը գիտեն: Մենք ցավում ենք այսպիսի արվեստագետ կորցնելու համար, բայց նա յուրաքանչյուրիս մեջ է ապրում»:
Կարդացեք նաև
Նշենք, որ Գ. Մելքոնյանի հուշատախտակի հեղինակն է քանդակագործ Տիգրան Արզումանյանը, ով այս պահին բացակայում է հանրապետությունից:
Լուիզա ՍՈՒՔԻԱՍՅԱՆ
