Արդարադատության նախարարության օրինականության վերահսկողության տեսչությունը վերջին մեկ տարվա ընթացքում դատավորների գործունեությունից դժգոհող 477 դիմում բողոք է ստացել: Տեսչության պետ Նորայր Փանոսյանն այսօրվա ասուլիսում ասաց, որ ուսումնասիրված բողոքներից 153-ով քաղաքացիները խնդրել են միջամտել դատական գործընթացին: Բայց պարոն Փանոսյանի խոսքերով, իրենց գործառույթների մեջ չի մտնում միջամտությունը:
149 դիմումներով քաղաքացիները պահանջել են կարգապահական վարույթ հարուցել դատավորի նկատմամբ՝ նյութական ու դատավարական նորմերի խախտման համար: Բայց տեսչությունը 106 դիմումներում դատավարական ու նյութական նորմի խախտումներ չի արձանագրել, 21-ում բացակայել է դատավորների նկատմամբ կարգապահական վարույթ հարուցելու պայմանը, չնայած որ, ըստ պարոն Փանոսյանի, դատավորների կողմից խախտումներ եղել են, բայց դրանք կոպիտ ու էական չեն համարվել:
22 դիմումներից 12-ի համաձայն էլ հարուցվել են վարույթներ: Դատավորներից մեկն արդեն ենթարկվել կարգապահական տույժի, մեկի գործը կարճվել է, 3 դատավորների գործերն էլ գտնվում են արդարադատության խորհրդում, իսկ 7 դատավորների գործերն էլ դեռ ուսումնասիրվում են:
Արփինե ՍԻՄՈՆՅԱՆ
