Այսօր «Լրագրողներ հանուն ապագայի» հ/կ-ի նախագահ Սուրեն Դեհերյանը ներկայացրեց Հայաստանի Հանրապետության 2012 թ. խորհրդարանական ընտրությունների հետընտրական զարգացումների լուսաբանման վերաբերյալ Հայաստանի առցանց ԶԼՄ-ների մշտադիտարկման հաշվետվությունը (2012թ. մայիսի 5- 20), որտեղ անդրադարձ է եղել 10 կայքերում մայիսի 5-ի լռության օրվան, մայիսի 6-ի ընտրությունների օրվան եւ հետընտրական երկու շաբաթների լուսաբանումների մշտադիտարկման արդյունքներին:
Դիտարկված լրատվամիջոցներ են՝ 1in.am, 7or.am, A1plus.am, Azatutyun.am, Civilnet.tv(am), Lragir.am, News.am, Tert.am, Panarmenian.net, Panorama.am:
Այս կայքերի ընտրությունը կատարվել է Circle.am վարկանիշային համակարգի տվյալների եւ մեդիա էքսպերտների շրջանում կատարված հարցման արդյունքում:
Դեհերյանը նշեց, որ մշտադիտարկման արդյունքները հնարավորություն են տալիս պատկերացնելու առցանց ԶԼՄ-ների լուսաբանման անաչառությունը խորհրդարանական ընտրություններին վերաբերող գործընթացների ժամանակ:
Կարդացեք նաև
«Ընդհանուր առմամբ՝ 10 առցանց ԶԼՄ-ներում 2012թ. ապրիլի 8-ից մինչեւ մայիսի 20-ը արձանագրվել եւ մշտադիտարկվել է 8156 հրապարակում, որտեղ կուսակցությունները հիշատակվել են 18 288 անգամ: Ընդ որում՝ քարոզարշավի ավարտից հետո, մայիսի 5-20-ը ներառյալ, եղել է ընդամենը 2787 հրապարակում եւ համապատասխանաբար 6902 անդրադարձ կուսակցություններին/դաշինքին: Ինչ վերաբերում է կուսակցություններին/դաշինքին վերաբերող հրապարակումներին, ապա քանակով առաջատար են Tert.am, Panarmenian.net, Panorama.am, 1in.am կայքերը»,- նշեց Դեհերյանը, ավելացնելով, որ կայքերից, օրինակ, 1in.am –ը առավել հաճախ անդրադարձ է կատարել «Ժառանգությանը», ՀՅԴ-ին եւ ՀԱԿ-ին, իսկ բացասական՝ ՀՀԿ-ին, ՕԵԿ-ին եւ ԲՀԿ-ին:
7or.am-ը դրական անդրադարձերի առավել մեծ քանակի է արժանացրել ԲՀԿ-ին, ՀՅԴ-ին, ՀԱԿ-ին, իսկ բացասականի՝ ՕԵԿ-ին, «Ժառանգությանը» եւ ՀՀԿ-ին:
A1plus.am-ում դրական անդրադարձերի մեծ մասը պատկանել են «Ժառանգությանը», ՀՅԴ-ին եւ ՀԱԿ-ին, իսկ բացասականը՝ ՀՀԿ-ին, ՕԵԿ-ին եւ ԲՀԿ-ին:
Azatutyun.am-ում դրական անդրադարձերը մեծամասամբ վերաբերվել են ՀՅԴ-ին, ՀԱԿ-ին եւ «Ժառանգությանը», իսկ բացասականները՝ ՀՀԿ-ին եւ ՕԵԿ-ին:
Lragir.am-ի դրական անդրադարձերի մեծամասնությունը «Ժառանգության», ՀՅԴ-ի եւ ՀԱԿ-ի մասին են եղել, իսկ բացասականը՝ ՀՀԿ-ի, ՕԵԿ-ի եւ ԲՀԿ-ի:
News.am կայքում դրական անդրադարձերը վերաբերվել են ՀՅԴ-ին, «Ժառանգությանը», իսկ բացասականները՝ ՀՀԿ, ՕԵԿ, ԲՀԿ, ՀԱԿ քառյակին:
Tert.am-ի դեպքում այլ միտում է եղել՝ ավելի հաճախ անդրադարձը բացասական է, քան դրական՝ ՕԵԿ-ի, ՀՀԿ-ի, ԲՀԿ-ի, ՀԱԿ-ի, «Ժառանգության» եւ ՀՅԴ-ի նկատմամբ:
Panarmenian.net-ը դրական է անդրադարձել «Ժառանգությանը», ՀՅԴ-ին, ՀԱԿ-ին, իսկ բացասական՝ ՀՀԿ, ԲՀԿ, ՕԵԿ եռյակին:
Panorama.am կայքն էլ բացառություն է կազմում ՀՀԿ-ի նկատմամբ դրական անդրադարձերի գերիշխող քանակով, բայցի այդ, դրական անդրադարձերի մեծ չափաբաժին ունեն ՝ ՀՅԴ-ն, «Ժառանգությունը», իսկ բացասականի մասով՝ ՕԵԿ-ը, ԲՀԿ-ն ու ՀԱԿ-ը:
Դեհերյանը նաեւ ասաց. «Հրապարակումների 11 տոկոսը չունեն հստակ նշված տեղեկատվության աղբյուր, իսկ 83 տոկոսն էլ՝ նշում է միայն մեկը: Բացի այդ, հրապարակումներում առկա է ժանրային սղություն, դրանց մեծամասնությունը լուրերի եւ ասուլիսների տեսքով է, իսկ վերլուծություններն ու հարցազրույցները շատ քիչ են: Մեդիա բովանդակության տեսանկյունից էլ պասիվ են կիրառվել մուլտի- մեդիա գործիքները: Կայքերի մի մասի դեպքում այլ լրատվամիջոցներից վերահրապարակումները զգալի մաս են կազմում: Եվ այս միտումը նկատելի է եղել 1in.am, Tert.am, Panarmenian.net եւ Panorama.am կայքերում. յուրաքանչյուր չորրորդ հրապարակում այլ լրատվամիջոցի հրապարակման ամբողջական վերարտադրությունն է»:
Եվա ՀԱԿՈԲՅԱՆ
