«Ազատագրված տարածքները սակարկման ենթակա չեն: Վերջին զարգացումները ցույց են տալիս, որ փորձ է արվում դրսի միջոցով ուժ գործադրել Հայաստանի վրա: Այսպիսի գործողությունները, որպես կանոն, ակտիվանում են այս կամ այն շարժման օրերին: Ցավալի է այն, որ գերտերությունները փորձում են հավասարակշռել զոհի և ագրեսորի գործողությունները»,-այսօր «Հայացք» ակումբում հայտարարեց Ադրբեջանական ԽՍՀ-ից փախստականների համագումարի նախագահության անդամ Սուսաննա Մելիքյանը:
Հղում անելով ազգերի ինքնորոշման իրավունքի կիրառմանը՝ տիկին Մելիքյանը նկատեց. «Ամերիկյան պետությունը 200 տարի առաջ Անգլիայի գաղութների դեմ պայքարում ազգերի ինքնորոշման իրավունքի վրա ամերիկյան պետություն ստեղծեց: Հիմա ասենք, որ ամերիկյան պետությունը օկուպացրե°լ է Անգլիայի տարածքները: Ինչ տարբերություն՝ ԼՂՀ-ն նույն սկզբունքի հիման վրա 20 տարի է կառուցում իր պետությունը, Ամերիկան՝ 200: Սա էլ ապացուցում է, որ գերտերությունները ունեն շահեր: Իսկ այս տարածաշրջանի ժողովուրդներին գերտերությունները զոհաբերում են տարածաշրջանի իրենց շահերին»:
Նախագահության անդամ Մարիամ Ավագյանն էլ նշեց. « Ինչո°ւ Մինսկի խմբի ճգնաժամային ենթախմբում չի ընդգրկվում ադրբեջանահայ փախստականների հարցը: Մենք հիմա հայտարարում ենք, որ ազատագրված տարածքներում հայ փախստականները միանշանակ իրավատեր են: Այսպես կոչված՝ օկուպացված, սակայն մեզ համար ազատագրված տարածքներում հայ փախստականությունը հնարավորություն ունի իրացնել իր իրավունքները և կառուցելու քաղաք: Այդ քաղաքի կառուցման համար կատարում ենք քայլեր: Մենք հուսով ենք, որ մեր քաղաքն ավելի գեղեցիկ է լինելու, քան Բաքուն, այն լինելու է ազատ տնտեսական գոտի և լինելու է խաղաղության խորհրդանիշ»:
Ադրբեջանահայ փախստականները տեղեկացրին, որ իրենց հիմնադրած քաղաքը կոչվելու է Բագարան և գտնվելու է Զանգելանի հարակից տարածքում:
Կարդացեք նաև
Տաթև ՀԱՐՈՒԹՅՈՒՆՅԱՆ
