Այսօր «Սոցիոմետր» կենտրոնի տնօրեն Ահարոն Ադիբեկյանը «Նոյյան տապան» ակումբում ներկայացրեց Ղարաբաղում իրենց անցկացրած հարցումները՝ առաջիկա ընտրությունների վերաբերյալ: Ըստ նրա, Ղարաբաղ տարածաշրջանի ամենաժողովրդավարական երկիրն է, չկա պիտակավորում, չկան փոխադարձ վիրավորանքներ: Պիտակավորման փոխարեն ղարաբաղցիները տիտղոս են տալիս. «Օրինակ, Բակո Սահակյանը հավակնում է «Շինարարի» պատվավոր տիտղոսին»:
Ահարոն Ադիբեկյանը ներկայացրեց, թե ինչքան գոհ են ղարաբաղցիները Բակո Սահակյանից, որ նա հավակնում է ոսկյա ձայների մոտ 90%-ին. «Ընտրությունների նախաշեմին Բակո Սահակյանի գործունեությանը տված գնահատականը ունի դրական աճ. 5 բալանոց սանդղակում 3,8-ից հասել է 4,5%-ի: Մի ծեր պապիկ ասաց, որ ընտրելու է Բակո Սահակյանին, հարցրեցի՝ ինչի՞, ասաց, որովհետեւ շինարար է, կառուցող է, գործարաններ, հիդրոէլեկտրակայաններ է կառուցել»:
Ահարոն Ադիբեկյանը ներկայացրեց նաեւ, թե 2007-2011-ին ինչ աննախադեպ զարգացոււմներ են եղել Ղարաբաղում՝ բնակչությունն աճել է 4,6 հազարով, գյուղատնտեսության արտադրանքն աճել է 35%-ով, արդյունաբերությունն ու շինարարությունը՝ կրկնակի:
Կարդացեք նաև
Ինչ վերաբերում է, թե ում են ղարաբաղցիները վստահում ղարաբաղյան հարցի լուծումը, Ադիբեկյանի խոսքերով՝ «Առաջ Այծեմնիկը Սերժ Սարգսյանն էր, հիմա՝ Բակո Սահակյանը: Եթե առաջ Սերժ Սարգսյանին ղարաբաղյան հարցի լուծումը վստահում էր 40.2%-ը, Բակո Սահակյանին՝ 33%-ը, ապա հիմա Սերժ Սարգսյանն իր դիրքերը զիջել է, նրան վստահում է 18.7%-ը, Բակո Սահակյանին՝ 24,7%-ը: Սերժ Սարգսյանի ցանկացած արտահատությունը ընդունում են որպես փոխզիջում»:
Հռիփսիմե ՋԵԲԵՋՅԱՆ
