Երևանի պետական ճարտարագիտական համալսարանի ռեկտոր Արա Ավետիսյանը Aravot.am- ի հետ զրույցում ասաց, որ մաթեմատիկա առարկայի առաջադրանքների շտեմարանը չի ուսումնասիրել: «Ճիշտն ասած, չեմ հասցրել նայել, դրա համար դրա հետ կապված խոսակցությունները չեմ ուզում մեկնաբանել, բայց անպայման կնայեմ, քանի որ շտեմարանի վերաբերյալ եւ կողմ, եւ դեմ խոսակցություններ կան»,-ասաց ռեկտորը:
Հետաքրքրվեցինք՝ իր կարծիքով ովքե՞ր են ԵՊՃՀ-ի պոտենցիալ դիմորդները՝ խելացինե՞րը, շտեմարանն անգիր անողնե՞րը, ապահովվածնե՞րը, թե՞ անապահովները, մանավանդ՝ որոշ բուհերում ուսման վարձերը անհամեմատ բարձր են: «Մեր բուհի պոտենցիալ դիմորդները ձեւավորվում են բնագիտական առարկաները լավ սովորելու պարագայում, ստեղծագործական ձիրք ունեցող մարդիկ են, որոնք ֆիզիկա, մաթեմատիկա իմացողներն են եւ ուզում են ինժեներ դառնալ»,- ասաց պարոն Ավետիսյանը:
Նա հավելեց, որ իրենց դիմորդների թիվն այս տարի ավելացել է. «Առաջին հայտով տեղերից ավելի շատ մարդ է դիմել՝ 1302 հոգի, երկրորդ-երրորդ հայտերով էլ՝ 4243 դիմորդ»:
Կարդացեք նաև
Իսկ ի՞նչ է արվում, որ շնորհալի, բայց ոչ վճարունակ ուսանողները ուսման վարձի խնդիր չունենան եւ կրթությունը միայն «էլիտարների» մենաշնորհը չդառնա: Արա Ավետիսյանը իրենց բուհի օրինակով նշեց, որ վարձավճարները տարբեր դրամաշնորհային կազմակերպությունների միջոցով եւ անհատների միջոցով կարելի է հոգալ.« Կոնկրետ մեզ մոտ 5-ից մինչեւ 20-30 լավագույն սովորողների վարձավճարները ամբողջովին փակում են այդ տեսակ կազմակերպությունները»:
Գոհար ՀԱԿՈԲՅԱՆ
