Արագածոտնի մարզի ընդհանուր իրավասության դատարանի դատավոր Ռուզաննա Բարսեղյանի նախագահությամբ մայիսի 24-ի դատավճռով անմեղ ճանաչվեց եւ արդարացվեց մեկը, ում նկատմամբ քրեական գործ էր հարուցվել:
Սենսացիան դեֆիցիտ դարձած դատական ակտն էր, որը հայաստանյան դատարաններում հաճախ չի կիրառվում: Խոսքն արդարացման դատավճիռների մասին է:
Քրեական գործ էր հարուցվել 1949թ. ծնված, ՀՌԱԿ անդամ, Աշտարակի Գր. Ղափանցյանի անվան թիվ 4 հիմնական դպրոցի ուսուցչուհի Հայրենուհի Գեւորգյանի նկատմամբ: Ուսուցչուհու նկատմամբ ընտրվել էր ստորագրություն՝ քաղաքից չբացակայելու մասին:
Մեղադրանքի կողմը հաստատված էր համարել այն, որ ուսուցչուհին անցյալ տարվա մայիսի 16-ին «խաթարելով դպրոցի բնականոն աշխատանքը, բացահայտ անհարգալից վերաբերմունք դրսեւորելով ուսուցիչների եւ աշակերտների նկատմամբ, շուրջ 5-6 րոպե տեւողությամբ, բարձրաձայն սեռական բնույթի հայհոյանքներ էր տվել դպրոցի տնօրեն Աստղիկ Մկրտչյանի եւ դպրոցի կոլեկտիվի հասցեին, դիտավորությամբ կոպիտ կերպով խախտել է հասարակական կարգը, կատարել խուլիգանություն»:
Կարդացեք նաև
Հայրենուհի Գեւորգյանի պաշտպանությունն իրականացնում էր ճանաչված փաստաբան Անժելա Կարապետյանը:
Մեղադրող Խ. Մուրադյանը դատաքննության ժամանակ հրաժարվեց մեղադրանքից եւ միջնորդեց ուսուցչուհու վերաբերյալ կայացնել արդարացման դատավճիռ՝ հանցակազմի բացակայության հիմքով:
Դատարանը առաջնորդվեց ՀՀ քրեական դատավարության օրենսգրքի 35 հոդվածի 1-ին մասի 2-րդ կետի դրույթներով, քրեական հետապնդումը ենթակա է դադարեցման, իսկ գործի վարույթը ենթակա է կարճման:
Իսկ մեղադրողի՝ մեղադրանքից հրաժարվելու դեպքում, դատարանը, համաձայն օրենքի, կայացնում է արդարացման դատավճիռ:
Հայրենուհի Գեւորգյանն արդարացվեց, ճանաչվեց անմեղ, իսկ ստորագրությունն էլ չբացակայելու մասով՝ վերացվեց:
ՌՈՒԶԱՆ ՄԻՆԱՍՅԱՆ
«Առավոտ» օրաթերթ
