ԲՀԿ մամուլի խոսնակ Տիգրան Ուրիխանյանը Aravot.am-ին մեկնաբանել էր ՀՀԿ պատգամավոր Արտակ Դավթյանի կոչը, որ ԲՀԿ-ի կարգախոսն է «Մեր խոսքը գործ է», եւ քանի որ կոալիցիոն հուշագրում ոչ թե բանավոր, այլ գրավոր խոստում է տվել առաջիկա ընտրություններում Սերժ Սարգսյանին սատարելու, կտեսնենք՝ կարգախոսին հետեւո՞մ են, թե՞ ոչ: Պարոն Ուրիխանյանն ասել էր, որ բառախաղի հետեից են ընկնում, ինչին այսօր իր հերթին պատասխանեց Արտակ Դավթյանը «Իրատես դե ֆակտո» ակումբում հրավիրած ասուլիսում: Նրա խոսքերով՝ «Իմ համար ավելի քան տարօրինակ էր՝ «բառախաղի հետեւեից ենք ընկնում» արտահայտությունը: Դա վիրավորական արտահայտություն էր 450 հազար ընտրողների համար, եթե նախընտրական տրամադրվածությունով ենք հասկանում մեր խոսքը գործ է,՝ ուրիշ բան: Ստացվում է՝ գործ է այնքանով, ինչքանով ընտրական պրոցեսներ են տեղի ունենում: Խորհուրդ կտայի, որ տեսակետներ արտահայտելուց առաջ մի փոքր ավելի խոհեմ պատասխաններ փնտրել ու գտնել»:
Ինչ վերաբերում է ՀԱԿ համակարգող Լեւոն Զուրաբյանի հայտարարությանը, որ կառավարության ծրագրին ամեն պարագայում դեմ են քվեարկելու եւ որ Տիգրան Սարգսյանը իրեն պահում է նեղացկոտ երեխայի պես՝ Արտակ Դավթյանը պատասխանեց. «Միշտ պարոն Զուրաբյանն է նեղացկոտ երեխայի պես պահում: Իրենց պարագայում այդպես էլ պետք է լիներ»:
Հռիփսիմե ՋԵԲԵՋՅԱՆ
