«Բանակում հոգեւոր առաջնորդի առաքելությունն է՝ զինվորների շրջանում բարձրացնել քրիստոնեական դաստիարակության ոգին, ամրապնդել հավատքը եւ օժտել հայրենասիրական գաղափարներով, քանի որ հայրենիք հասկացությունն ասոցացվում է հավատքի հետ եվ օգնում զինվորին կատարել իր առաքելությունը»,-«Երկու երես» մամուլի ակումբում այսօր ասաց Արարատ-Զոդ զորամասի հոգևոր առաջնորդ Տեր Համբարձում քահանա Դանիելյանը: Նա փաստեց, որ բանակում հոգեւորականի քարոզչությունը տալիս է շոշափելի արդյունք. «Զինվորների եւ սպայական անձնակազմի մասնակցությամբ պարբերաբար կազմակերպվում են դասընթացներ եւ քննարկումներ, ինչպես նաեւ՝ զինվորներին մասնակից ենք դարձնում Սուրբ Պատարագին եւ նախապես ծանուցում եկեղեցական տոների մասին: Մեծ զորամասերում մարտական հերթափոխից առաջ միասնական աղոթք ենք անում եւ զրուցում զինվորների հետ»: Տեր Համբարձումը հավելեց, որ այդ կերպ զինծառայողները հարգանքով եւ սիրով են լցվում միմյանց հանդեպ:
Խոսելով աղանդավոր զինծառայողներից՝ քահանան նշեց, որ հոգեւորականի գործունեությունը նաեւ ուղղված է կրոնական հողի վրա հիմնված բախումները կասեցնելուն. «Աղանդավորին դարձի բերելու համար բանակն իդեալական միջավայր է, քանի որ այնտեղ նրանք հեռու են աղանդավորների հետ շփումներից: Եղել են աղանդավոր զինվորներ, ովքեր ետ են կանգնել մոլորության ճանապարհից: Զորացրվելուց հետո էլ մենք աշխատում ենք նրանց ներգրավվել Առաքելական եկեղեցու տարբեր երիտասարդաց միություններում՝ նրանց հետ կապը պահպանելու նպատակով, նաեւ ուղտագնացություններ ենք կազմակերպում»:
Հոգեւորականի խոսքով՝ բանակում տիրում է սիրո եւ հարգանքի մթնոլորտ, չնայած մարդկանց շրջանում համատարած ատելությանը. «Շատերը բանակում լավ ընկերներ են ձեռք բերում: Հոգեւորականները մշտապես զինվորներին հորդորում են բանակից թշնամիներ չտանել»:
Ինչ վերաբերում է զինված ուժերում տեղի ունեցած վերջին իրադարձություններին, քահանան ասաց. «Մեր զինվորները կատարեցին իրենց առաքելությունը: Թշնամու ինչ-ինչ ոտնձգությունների պարագայում մենք գիտենք, որ նրանք ունեն բարոյահոգեբանական բարձր պատրաստվածություն»:
Կարդացեք նաև
Լուիզա ՍՈՒՔԻԱՍՅԱՆ
