Նախկին արտգործնախարար, ԱԺ «Բարգավաճ Հայաստան» կուսակցության խմբակցության անդամ Վարդան Օսկանյանի շուրջ վերջին օրերին ծավալվող իրադարձությունները ինչ չափով որ երևան են բերում մեր քաղաքական իրականության քստմնելի կողմերը, նույնքան էլ` այս անվայել իրարանցումը քաղաքական կապիտալի վերածելու իշխանական որոշակի շրջանակների ցանկությունը:
Ամենահետաքրքրականը, մեր կարծիքով, մնում է իշխանության ներկայացուցիչներից մեկի` ԱԺ փոխնախագահ, ՀՀԿ մամուլի քարտուղար Էդուարդ Շարմազանովի համարյա բետոնե դիրքորոշումն այն գերիշխող տեսակետի դեմ, թե նախկին արտգործանախարարի հանդեպ քաղաքական պատվեր է իրականացվում:
Հանրապետականի մամուլի քարտուղարը պաթոսով հերքում է դրա հավանականությունը, ավելին` համոզված է, որ հատկապես վերջին տարիներին Հայաստանում վերջ են տրված քաղաքական պատվեր կոչված երևույթի բոլոր դրսևորումներին` «նախագահ Սերժ Սարգսյանի գլխավորությամբ»: Այս վստահությունը որքան ծիծաղելի է իր պարզամտությամբ, նույնքան տաղտկալի է երևույթներին այսօրինակ իշխանահաճո գնահատականներ տալու մշտապատրաստությամբ:
Արդ փորձենք հասկանալ, թե Էդուարդ Շարմազանովը որտեղի՞ց գիտի, որ Վ. Օսկանյանի դեմ սկսված ԱԱԾ քայլը քաղաքական հետապնդում չէ: Եթե ընդունենք, որ դա, այնուամենայնիվ, քաղաքական պատվեր է, ապա արդյո՞ք Շարմազանովը պիտի դրա մասին իմանար: Ինչո՞ւ պիտի երկիրը բացարձակ միանձնյա սկզբունքով ղեկավարող անձը որևէ մեկին հայտներ իր կողմից ծրագրվող քաղաքական հետապնդման մասին, չէ՞ որ դա կլիներ բացարձակապես անտրամաբանական և անհեթեթ:
Կարդացեք նաև
Դա Շարմազանովի ու նրա նմանների չիմանալու բան պիտի լիներ հենց թեկուզ այն պատճառով, որ պատվեր տվողը որևէ կերպ չընկներ նրանց աչքից, ինչու չէ, երբևէ նաև չդառնար հնարավոր թիրախ: Հետևաբար, տրամաբանական բոլոր փաստարկները խոսում են այն մասին, որ Շարմազանովը, նրա հանգույն նաև վարչապետ Տիգրան Սարգսյանն ու մյուսները չէին կարող իմանալ և չպիտի իմանային նախապատրաստվող քաղաքական պատվերի մասին, ուստի իսկապես զարմանալի է այդ մարդկանց աներեր վստահությունն առ այն, որ Հայաստանի Հանրապետությունում վերջին տարիների ընթացքում որևէ քաղաքական պատվեր չի իջեցվել, այդ թվում` նաև Վ. Օսկանյանի դեմ, և որ իշխանությունը օրնիբուն կառուցում է ժողովրդավարական Հայաստան`«պարոն Սերժ Սարգսյանի գլխավորությամբ»:
Տեսնես կգա՞ մի օր, որ Շարմազանովի նման այս աներեր հավատով համակված լինենք նաև մենք բոլորս:
«Երկիր»
