Հատված ԲՀԿ ժամանակավոր մամուլի խոսնակ, ԱԺ պատգամավոր Տիգրան Ուրիխանյանի հետ հարցազրույցից:
– ԲՀԿ–ն ի վերջո ԱԺ կանոնակարգ-օրենքի համաձայն հանդես կգա՞ հայտարարությամբ, որ ինքն ընդդիմադիր խմբակցություն է լինելու ԱԺ–ում։
– Ձեւակերպման հետ կապված՝ մենք ընդհանուր քննարկում չենք ունեցել։ Բայց մեզ համար առաջնայինը ոչ թե ձեւակերպումն է, այլ իրական ձեւաչափը գործունեության, համոզմունքների համապատասխանության եւ այն ակնկալիքների, որոնք որ մեզանից ունի զանգվածը։ Այն, որ մեզ տարբեր կողմերից փորձում են պարտագրել ինչ-որ ձեւակերպումներ… Մենք անում ենք այն, ինչը որ բխում է մեր համոզմունքներից, մենք անում ենք այն, ինչ մեզանից ակնկալում է մեզ վստահած զանգվածը, ՀՀ բնակիչներն ու քաղաքացիները։ Մենք չենք պատրաստվում քողարկել մեր գործունեությունն այս կամ այն ձեւակերպման տակ՝ ավելացնելով կամ պակասեցնելով մեր գործունեության կշիռը։ Թող մարդիկ գնահատեն եւ դա, եւ ձեւակերպումն ինքը կծնվի անմիջապես դրանից հետո, եւ պարզ կդառնա, թե ԲՀԿ-ն իրականում ինչ է իրենից ներկայացնում։
– Կարգավիճակի չհստակեցումը նախեւառաջ ձեր խմբակցության համար է անհասկանալի պայմաններ ստեղծում։ Ի՞նչն է խանգարում ընդամենը մի ձեւակերպում տալ եւ գործել ավելի արտոնյալ կարգավիճակում՝ թե էթիկայի հանձնաժողովի, թե ձայնի իրավունքի եւ թե այլ հարցերում։
Կարդացեք նաև
– Գիտեք ինչն է խանգարում, մենք չենք ուզենա, որ որեւէ մի ձեւակերպում կաշկանդի սեփական կուրսը վարելիս, որովհետեւ շատ ժամանակ որեւէ ձեւակերպում հետո առաջացնում է տարակարծություններ ու տարբեր հարցադրումներ. «բա որ դուք էսպիսին եք, բա ինչո՞ւ դուք չեք անում սա»։ Ուրեմն եկեք թողեք՝ մենք մեր գործունեությունն իրականացնենք, որը կբխի սեփական համոզմունքներից եւ քաղաքական կուրսը վարելու ցանկությունից, եւ երկրորդ՝ մեր զանգվածի ակնկալիքներից։ ԲՀԿ-ն շատ հստակ աշխատում է զանգվածի հետ եւ հստակ ակնկալում, թե մարդիկ ինչ են իրենից սպասում։ Եթե մարդիկ ակնկալում են ոչ թե ցնցումներ, այլ ռեֆորմներ, ուրեմն մենք իրենց մատուցելու ենք ռեֆորմներ եւ չենք պատրաստվում ինչ-որ ձեւակերպումներով սահմանափակել եւ շրջանակների մեջ վերցնել մեր քայլերը։ Եվ եթե մենք ինչ-որ ձեւակերպումներ անելով պետք է կորցնենք արտոնություններ, գիտեք ինչ կա. մեզ համար, ընդգծում եմ, գերադասելի է զանգվածի ցանկությունը, քան ԱԺ կանոնակարգի ընձեռած արտոնությունները։ …Սա բացարձակապես չի նշանակում, որ ես խուսափում եմ «ընդդիմադիր» բառից…
– Ասացիք՝ զանգվածի ցանկությունն է կարեւոր, Ձեր ասած զանգվածը չի՞ ցանկանում, որ ընդդիմադիր լինեք, հարցում–ստուգատե՞ս եք անցկացրել դրա վերաբերյալ։
– Ամենօրյա մեր գործունեությունը ստուգատես է։ Ամեն օր զանգվածի մեջ լինելով եւ պահելով համագործակցային հարաբերությունները՝ մենք շատ լավ ենք հասկանում, թե ինչ է մեզանից ուզում։
Լուսինե ՇԱՀՎԵՐԴՅԱՆ
«Հրապարակ»
