Այսօր ՀՀ նախագահի նստավայրի մոտ ցույցի էին դուրս եկել ապարանցիները: Նրանք, նկատի ունենալով ՀՀԿ-ի «Հավատանք, որ փոխենք» կարգախոսը, պաստառներ էին բերել՝ «Հավատում ենք, որ կփոխեք N231 որոշումը» գրառմամբ:
Բանն այն է, որ կառավարության N231 որոշմամբ՝ Ապարանի Ֆիզմաթ թեքումով դպրոցի շենքը պետք է տրամադրվի Ռազմական վարժարանի համար, իսկ Ֆիզմաթ թեքումով դպրոցի աշակերտներին էլ մտադիր են տեղափոխել ու վերամիավորել Ապարանի ավագ դպրոցին: Աշակերտներն ու ուսուցչական կազմն ընդդիմանում են, որովհետեւ մոտակա 40 գյուղերից շատ երեխաներ են հաճախում՝ կրթություն ստանալու, իսկ տեղափոխման դեպքում երեխաներից շատերը ստիպված են լինելու անհարմարությունների պատճառով չհաճախել դպրոց: Աշակերտները պահանջում էին. «Հարգեք 8000 բնակիչների կամքը, մի զրկեք Ապարանը քոլեջից, մի զրկեք մեզ մեր հարազատ ֆիզմաթից»: Կրթության եւ գիտության նախարար Արմեն Աշոտյանից խնդրում էին իրենց կողքին կանգնել ու պաշտպանել կրթության ջատագովներին:
Ծնողներից մեկը՝ Անահիտ Պետրոսյանը պատմում էր, որ իրենց տեղյակ էլ չեն պահել՝ շենքը ուրիշին տալու որոշում են կայացրել, բացի այդ, ոչ ոք չի բացատրում, թե ինչու է ավելի կարեւոր Ռազմական վարժարանը, քան թե ֆիզմաթ դպրոցը:
Աշակերտական եւ ուսուցչական կազմը բազմաթիվ ստորագրություններով դիմել է ԿԳ նախարարին, սակայն նախարարը տեղեկացրել է, որ այդ որոշումն անբեկանելի է:
Հռիփսիմե ՋԵԲԵՋՅԱՆ
Կարդացեք նաև
