ՀՅԴ Բյուրոյի անդամ, ԱԺ պատգամավոր Վահան Հովհաննիսյանը չի բացառում, որ ՀՀ նախկին արտգործնախարար, ԲՀԿ անդամ Վարդան Օսկանյանի դեմ ԱԱԾ-ի կողմից քրեական գործ հարուցելու փաստը կարող է կապված լինել նրա քաղաքական գործունեության ակտիվացման հետ:
«Իհարկե, պահի ընտրությունը կարող է որոշ կասկածներ առաջացնել»,- yerkir.am-ի թղթակցի հետ զրույցում ասաց նա:
Վահան Հովհաննիսյանը նշեց, որ, Վարդան Օսկանյանին եւ նրա ընտանիքին անձամբ ճանաչելով, խիստ կասկածում է, որ նա կարող էր ներգրավված լինել նման ծանր հանացագործության մեջ, բայց, քանի որ ծանոթ չէ գործի մանրամասներին, չգիտի` ինչ փաստարկների կամ ապացույցների վրա են հիմնված այդ մեղադրանքները, ապա իրավական գնահատականներ տալ չի կարող:
«Մի բան գիտեմ, որ եթե քրեական մեղադրանքներով քողարկվում է քաղաքական հետապնդումը, սա ինձ համար եւ Դաշնակցության համար բացարձակապես անթույլատրելի եւ անընդունելի է, մենք միշտ նման երեւույթներին դեմ ենք եղել եւ կլինենք: Բայց կոնկրետ իրավական բնույթի քննարկում ես չեմ կարող անել, որովհետեւ բացարձակապես ծանոթ չեմ մեղադրանքի բնույթին: Կասկածում եմ, սակայն, որ նման մեղադրանքները կարող են իսկապես Օսկանյանի վերաբերյալ լինել»,- նշեց դաշնակցական գործիչը:
Կարդացեք նաև
Ինչ վերաբերում է Օսկանյանի հայտարարության առնչությամբ ՀՀԿ խոսնակ Էդուարդ Շարմազանովի արած մեկնաբանությանը, թե Հայաստանում քաղաքական հետապնդումների և քաղաքական պատվերների դարաշրջանն արդեն անցյալում է, ՀՅԴ պատգամավորն ասաց, որ «պարոն Շարմազանովի օպտիմիզմը չի կիսում»:
«Չեմ ուզում հավատալ, որ նման բան հնարավոր է, բայց բացառել, ցավոք, չեմ կարող»,- հավելեց նա:
«Երկիր»
