«Կառավարության բերած ծրագրին չենք կարող կողմ քվեարկել, որովհետեւ արդեն տեսել ենք, որ իր կողմից բերած ծրագրերը չեն իրականացրել այս իշխանությունները: Գործելու է մի կառավարություն, որը մսխելու է բյուջետային միջոցները: Ամենալավ ծրագիրն էլ բերես՝ եթե քեզ ոչ ոք չի հավատում, դա տապալված է, դրա համար էլ մենք դեմ ենք քվեարկելու»,-այսօր հրավիրած ասուլիսում հայտարարեց ՀԱԿ համակարգող Լեւոն Զուրաբյանը:
Քանի որ, մի քանի օր առաջ Հրանտ Բագրատյանը այլ բան էր հայտարարել՝ ասելով, որ եթե լավ ծրագիր ներկայացնի, ինքը անձամբ կողմ կքվեարկի, լրագրողների՝ այս հակասության հետ կապված հարցերին պարոն Զուրաբյանը պատասխանեց, որ հակասություն չկա եւ որ «Ֆրակցիայում հարցը չի քննարկվել ընդհանրապես»:
Պարոն Զուրաբյանը նաեւ նշեց, որ դեմ քվեարկելու որոշումը դեռ չի նշանակում, որ իրենք բովանդակային քննարկումից են հրաժարվում. «Տիգրան Սարգսյանը այդ հնարավորությունը ուներ, կարող էր երեխայի նեղացկոտությունը մի կողմ թողներ, գար: Եթե գար ֆրակցիա՝ իր ծրագիրը ներկայացնելու, ոչ ոք նրան չէր վռնդելու, մենք քաղաքակիրթ մարմին ենք, կարող էր գալ մեր խմբակցություն՝ սիրով կքննարկեինք այդ ծրագիրը իր հետ: Եթե ինքը հիմա ուզում է՝ էլի թող գա»:
Հռիփսիմե ՋԵԲԵՋՅԱՆ
