Այսօր ՀԱԿ համակարգող Լեւոն Զուրաբյանից լրագրողները հետաքրքրվեցին՝ ինչպե՞ս եք վերաբերում Օսկանյանին ԱԱԾ հրավիրելուն, նա քաղաքական ենթատեքստ է տեսնում՝ պարոն Զուրաբյանը պատասխանեց. «Եթե մենք ապրեինք նորմալ, դեմոկրատական պետությունում, սա կարող էր դիտարկվել նորմալ գործընթաց: Իրավապահ մարմինները կարող են զբաղվել հ/կ-ների ֆինանսավորման օրինականությամբ եւ օրենքով պատժել: Բայց քանի որ մենք ապրում ենք պետությունում, որի պատկերը շատ լավ պատկերացնում ենք, ինքներս ներկայացրել ենք, ունենք նախադեպեր, չեմ զարմանա, որ պարզվի, որ այս ամենը իսկապես պայմանավորված է քաղաքական հետապնդմամբ: Այսօր այսքանը»: Հարցին՝ հնարավո՞ր է նման քայլով չեզոքացնում է իշխանությունը՝ Օսկանյանի՝ նախագահ դառնալու վտանգը՝ պարոն Զուրաբյանը չպատասխանեց:
Շահարկումներով եւ հասարակական կարծիքի մանիպուլյացիաներով զբաղվողներին պարոն Զուրաբյանն ասում է՝ մենք լուրջ քաղաքական ուժ ենք, եւ նախագահի թեկնածուի հետ կապված կարեւորագույն որոշում ընդունելու ենք այն ժամանակ, որը նախատեսված է. «2007-ի ընտրություններին Տեր-Պետրոսյանը առաջադրման մասին որոշումն ընդունել է հոկտեմբերին՝ հանրահավաքի ժամանակ: Եթե ընդուներ հունիսին՝ դա լուրջ չէր լինի: Տեր-Պետրոսյանը լուրջ քաղաքական գործիչ է, մենք գիտենք, թե երբ է գալիս այդ հարցին պատասխանելու ժամանակը: Տեր Պետրոսյանը եղել է եւ շարունակում է մնալ ՀԱԿ-ի անվիճելի լիդերը: Նա ունի լրջագույն հեղինակություն, այդ գնահատականները տարածվում են Կոնգրեսից դուրս: Եթե հարցը դնենք այսպես՝ թե ո՞վ կարող է հաղթել բռնապետության թեկնածուին, ապա պատասխանը պետք է փնտրել հետեւյալում՝ ո՞վ կարող է իր շուրջը համախմբել առավելագույն չափով քաղաքական ուժերի, քաղաքացիների: Ես վստահ եմ, որ այս առումով Տեր-Պետրոսյանն իր այլընտրանքը չունի: Այդ կարծիքը կիսվում է Կոնգրեսում բոլորի կողմից»:
Հռիփսիմե ՋԵԲԵՋՅԱՆ
