ԵԱՀԿ գործող նախագահ, Իռլանդիայի Հանրապետության փոխվարչապետ և ԱԳ նախարար Էեմոն Գիլմորը Հայաստան այցելությունից հետո շաբաթվա վերջին կայցելի նաև Ադրբեջանի մայրաքաղաք Բաքու: Լրագրողների հետ հանդիպման ընթացքում Գիլմորը հայտարարեց, թե իրենք մտահոգված են և հատուկ ուշադրություն են դարձնում ԼՂՀ կարգավորման գործընթացին: Սակայն, ինչպես հայտնի է, Է. Գիլմորը ԼՂՀ չի այցելելու: Ուստի այն հարցին՝ ինչու նա չի այցելելու ԼՂՀ՝ անձամբ իրավիճակին ծանոթանալու, ԵԱՀԿ գործող նախագահը պատասխանեց. «Արդեն գոյություն ունի մեխանիզմ՝ ըստ որի առաջ են ընթանում հարաբերությունների թնջուկի լուծմանն ուղղված գործընթացները: Խոսքը Մինսկի խմբի համանախագահների մասին է: Իսկ ես սատարում եմ այդ գործընթացին: Այստեղ խոսքը տարածքային անձեռնմխելիության, ուժի կիրառությունից ձեռնպահ մնալու, ինքնորոշման իրավունքի մասին սկզբունքներին է վերաբերում: Մենք չենք կարող լուծում հորինել, բայց կարող ենք օգնել ու սատարել համանախագահներին»: ՀՀ ԱԳ նախարարն էլ անդրադարձավ թուրքական կողմի ցավակցություններին` շփման գծում միջադեպերի հետեւանքով ադրբեջանցի զինծառայողների մահվան կապակցությամբ: Նա նշեց. «Այս ամենից ֆաշիստական հոտ է գալիս: Երբևէ չենք լսել, որ Թուրքիան մտահոգված լինի Ադրբեջանի սադրանքների արդյունքում հայ զինծառայողների սպանություններից, այն ժամանակ, երբ միջազգային հանրությունը խստորեն դատապարտում է արյունալին միջադեպերը և կոչ անում կողմերին զերծ մնալ ուժի կիրառությունից: Այս հայտարությունները Թուրքիայի կողմից խրախուսում են Ադրբեջանի նոր սադրանքներ: Այն դեպքում, երբ Ադրբեջանը մերժում է Մինսկի խմբի եռանախագահների սկզբունքները, թուրքական կողմը փորձում է ադրբեջանական պատասխանատվությունը բարդել այլոց վրա և ձևացնում, թե իբր տեղյակ չէ: Ինչպես վերջին 20 տարիները ցույց տվեցին, Թուրքիան ոչ միայն չեզոք և անաչառ չէ, այլև վնաս է հասցնում ԼՂՀ կարգավորման գործընթացին: Հարց է բարձրանում, թե ինչքանով է համահունչ Թուրքիայի մոտեցումները Մինսկի խմբի սկզբունքներին»: Երբ խոսք գնաց շփման գծում միջադեպերի հետաքննության մասին, պարոն Նալբանդյանը հիշեցրեց, որ ի տարբերություն Ադրբեջանի, երբ Հայաստանն ինչ-որ բանի մասին պայմանավորվածություն է ձեռք բերում, հաջորդ օրը հետ չի կանգնում:
Տաթև ՀԱՐՈՒԹՅՈՒՆՅԱՆ
