«Չնայած մեր երկու երկրները աշխարհագրորեն մոտ չեն գտնվում, բայց դարերից եկող գործընկերային կապեր են հաստատվել երկու ժողովուրդների միջև: Հայաստանը կարևորում է հարաբերությունների զարգացումը և ամրապնդումը Իռլանդիայի հետ»,-այսօր հայտարարեց ՀՀ ԱԳ նախարար Էդվարդ Նալբանդյանը ԵԱՀԿ գործող նախագահ, Իռլանդիայի Հանրապետության փոխվարչապետ և ԱԳ նախարար Էեմոն Գիլմորի հետ համատեղ մամուլի ասուլիսի ժամանակ: Պարոն Նալբանդյանը նաև տեղեկացրեց, որ ինքն Է. Գիլմորի հետ քննարկել է նաև ԼՂՀ-ի հարցը, ինչպես նաև վերջին զարգացումները: Այս համատեքստում ՀՀ ԱԳ նախարարը նշեց. «Մենք համամիտ ենք, որ խաղաղ կարգավորմանը այլընտրանք գոյություն չունի»: Է. Գիլմորն էլ նշեց. «Մենք հատուկ ուշադրություն ենք դարձնում ԼՂՀ հակամարտության կարգավորմանը: Իմ այցը Երևան զուգորդվում է նաև Բաքու այցելության հետ: Իմ ուղերձը նույնն է լինելու Բաքվում, ինչ Երևանում: Ցանկանում եմ, որ երկու կողմերն էլ նորոգեն իրենց հայտարարությունները, մասնավորապես վերջերս տեղի ունեցած էսկալացիայի և բախումների ներքո լուրջ քայլեր ձեռնարկելու կարիք ունեն երկու կողմերն էլ: Ուստի կոչ եմ անում ձեռնպահ մնալ պատասխան միջոցառումներից, ուժի կիրառումից: Այս հակամարտությունը չպիտի լուծվի ուժի կիրառության սպառնալիքի միջոցով: ԵԱՀԿ-ն կարող է հարթակ տրամադրել երկխոսության համար և սատարել կողմերին, բայց մենք չենք կարող պարտադրել լուծում: Բայց միանշանակ է, որ կողմերը դիպուկահարներին պիտի հեռացնեն շփման գծից: Այդ շրջաններում ապրող մարդիկ արժանի են խաղաղության, այլ ոչ թե՝ փխրուն ստատուս քվոյի»:
Տաթև ՀԱՐՈՒԹՅՈՒՆՅԱՆ
Կարդացեք նաև
