Որքան էլ ԿԳ նախարար Արմեն Աշոտյանը եւ կրթության ոլորտի ներկայացուցիչները գոհ են շտեմարանային եղանակով քննություններից, արդյունքները այլ բան են վկայում՝ անգիր անելու հնարավորությունը մեծ է: Դրա մասին՝ նաեւ թվային փաստերով. օրինակ, եթե 2010-ին հայոց լեզու եւ գրականություն առարկայից ընդամենը երկու 20 միավոր էր գրանցվել, ու հանրությունը տենչում էր իմանալ, թե ովքեր են այդ երջանիկները, այսօր 20 միավոր ստացած դիմորդների թիվը 200-ից ավելի է: Ընդ որում՝ հայերենի միջին միավորը՝ 13,9-ը, բարձր է անգամ նախորդ տարվա նույն առարկայի միջինից, այն դեպքում, երբ 2011թ. դիմորդների համար անհամեմատ հաղթահարելի թեստեր էին կազմվել, քանի որ նրանք նախորդ տարիների շրջանավարտներ էին:
ԿԳ նախարարը փաստում է, որ քննությունների միջին միավորի բարձր լինելը պատճառ կլինի ավելի մեծ մրցույթի: Մյուս կողմից էլ հավելում է, որ բուհական կրթության կառավարության բանաձեւը հետեւյալն է՝ հնարավորինս հեշտ ընդունելություն, դժվար պետական ավարտական քննություններ: «Շատ ուրախ եմ, որ հասարակությունն այս տարի չի ապրում ընդունելության քննություններով, 4-րդ տարին է՝ նախարար եմ, առաջին անգամ եմ տեսնում նման հանգիստ մթնոլորտ, հանգիստ ծնողներ, լարվածություն չկա, ինքս էլ լարված չեմ»,-հայտարարում է Արմեն Աշոտյանը:
Դառնալով հայոց լեզու եւ գրականություն առարկայի քննության արդյունքներին, հավելենք, որ 17,5-20 միավոր է հավաքել 2680 մարդ կամ դիմորդների 23 տոկոսը, 13,5-17,25 միավոր՝ 3725 դիմորդ (32,6%), 7,5-13,5՝ 4379 կամ 38,3%: Հայոց լեզու եւ գրականություն առարկայից դրական միավորի շեմը չի հաղթահարել 635 մարդ (5,6%):
Գոհար ՀԱԿՈԲՅԱՆ
