Մարդու իրավունքների միջազգային փորձագետ Պերնան դը Վարենը ջավախահայ քաղաքական գործիչ Վահագն Չախալյանի ձերբակալությունը եւ դատավարությունը Վրաստանում համարեց մարդու իրավունքների մի շարք խախտումներով կայացած:
Փորձագետն այսօր «Հենարան» ակումբում ասուլիսի ժամանակ ասաց, որ Չախալյանի դեպքը այն բացառիկ դեպքերից է, երբ միաժամանակ իրավունքի 4 կետ է խախտվել: Առաջինը՝ մեղադրյալի ինքնապաշտպանության իրավունքը, վկաների հարցաքննության, իրավաբանական խորհրդատվության ընտրության եւ թարգմանությունից օգտվելու իրավունքը: Փորձագետը մեծ հույսեր է կապում Եվրոդատարանի հետ: Ըստ նրա՝ գործը գտնվում է Եվրոդատարանում եւ ուսումնասիրությունից հետո Եվրոդատարանը նույնպես կարձանագրի, որ Վրաստանում դատավարությունն անցել է կոպիտ խախտումներով: Փորձագետը նկատեց, որ 2006թ. սկսած, Վրաստանում ազգային փոքրամասնություններին իշխանությունները վատ են վերաբերվում, նրանց համար խոչընդոտներ ստեղծում: Նա մասնավորապես նկատել է մի քանի դեպքեր, երբ լուսանկարիչներին մեղադրել էին լրտեսության մեջ, երբ վերջիններս ցույցերի լուսանկարներ էին Վրաստանից դուրս ուղարկել: Փորձագետն ասաց, որ վերջին շրջանում կրկին լրտեսության մեղադրանքով ձերբակալվել են մի շարք անհատներ այն բանի համար, որ հարցաթերթիկներ էին լրացրել, նրանց մի մասն էլ հանդիպել էր Եվրախորհրդի ներկայացուցիչների հետ:
Հարցին, թե Վրաստանի կառավարությունը կկատարի՞ Չախալյանի գործով Եվրոդատարանի որոշումը, փորձագետը վստահեցրեց, որ նման դեպքերում Եվրոդատարանը գումարային փոխհատուցում կպահանջի, իսկ նման դեպքերում Վրաստանի կառավարությունը սովորաբար վճարում է: Փորձագետը նաեւ հավելեց, որ իրենց ուսումնասիրությունների համաձայն, Չախալյանը վրացական իշխանությունների թիրախ է դարձել հենց հայ համայնքի ակտիվիստ լինելու համար:
Կարդացեք նաև
Արփինե ՍԻՄՈՆՅԱՆ
