Անցյալ ուրբաթ օրը Հայ ազգային կոնգրես խորհրդարանական խմբակցության ղեկավար Լեւոն Զուրաբյանը մեզ հայտնել էր, որ ՀՀ վարչապետ Տիգրան
Սարգսյանը Կոնգրեսի ներկայացուցիչներին իր հետ հանդիպելու առաջարկ չի արել։ Հիշեցնենք, վարչապետը հանդիպել էր ՀՀԿ-ի, ԲՀԿ-ի, ՕԵԿ-ի, Դաշնակցության եւ «Ժառանգության» ներկայացուցիչների հետ: Մեր թղթակցի հարցին, թե ինչու Տիգրան Սարգսյանը Կոնգրեսի ներկայացուցիչներին հանդիպման առաջարկ չի արել, վարչապետի խոսնակ Հարություն Բերբերյանը երեկ պատասխանել է. «Հայ ազգային կոնգրեսի ԱԺ խմբակցության ղեկավար Լեւոն Զուրաբյանի այն հայտարարությունը, որ երբ կառավարությունն իր ծրագիրը ներկայացնի, ՀԱԿ-ը դեմ է քվեարկելու, ի սկզբանե փակուղի է տանում ծրագրի հնարավոր քննարկումը Հայ
ազգային կոնգրեսի եւ Հայաստանի կառավարության միջեւ»։ Նկատենք, սակայն, որ «Ժառանգություն» խմբակցության պատգամավոր Ալեքսանդր Արզումանյանը եւս հայտարարել էր, որ իրենք միանշանակ «դեմ» են քվեարկելու կառավարության ծրագրին: «Պարզ է, որ «Ժառանգությունը» պիտի «դեմ» քվեարկի, ընդդիմադիր խմբակցություն է»,- ասել էր Արզումանյանը՝ նեղսրտելով մեր տված հարցից: Այնպես որ, վարչապետի խոսնակի երեկվա
մեկնաբանությունը «լոլո» է։ Ի սկզբանե պարզ էր, որ Կոնգրեսի պատգամավորները նման հանդիպման չէին գնալու, եւ Տիգրան Սարգսյանը չի ցանկացել անհարմար դրության մեջ հայտնվել։
Կարդացեք նաև
«Հայկական ժամանակ»
