Քիչ առաջ տարածված հայտարարությամբ ԲՀԿ խմբակցության պատգամավոր, ՀՀ նախկին արտգործնախարար Վարդան Օսկանյանը տեղեկացրել է, որ կառավարությանն առընթեր ազգային անվտանգության ծառայությունն իրեն որպես վկա հրավիրել էր ցուցմունք տալու՝ Քրեական օրենսգրքի 190-րդ հոդվածի 3-րդ կետի («Հանցավոր ճանապարհով ստացված եկամուտներն օրինականացնելը (փողերի լվացումը)») հատկանիշներով հարուցված քրեական գործի շրջանակում, որն առնչվում է իրեն և իր հիմնադրած Սիվիլիթաս հիմնադրամի գործունեությանը: «Ինձ համար զարմանալի և տարօրինակ է, որ իմ և Սիվիլիթաս հիմնադրամի գործունեությունը որևէ կերպ կարող է շաղկապվել հանցավոր և անօրինական փողերի հետ: Առավել զարմանալի է, որ նման հարց առաջ է քաշվում հենց այն ժամանակ, երբ ես ներգրավվել եմ քաղաքական գործընթացներում: Ակնհայտ է, որ հարուցված քրեական գործի հետևում քաղաքական պատվեր կա»,- ասված է Վարդան Օսկանյանի տարածած հայտարարության մեջ:
Aravot.am-ի հետ զրույցում մեկնաբանելով նախկին արտգործնախարարի սույն հայտարարությունը, ԲՀԿ մամուլի խոսնակ Տիգրան Ուրիխանյանն ասաց. «Ինչպես մշտապես, այնպես էլ հիմա, ուզում եմ հույս հայտնել, որ հայաստանյան իրավապահ մարմինները, ցանկացած դեպքում, իրենց գործունեության շրջանակներում իրականացվող ցանկացած քայլ բացառապես պայմանավորելու են ՀՀ գործող օրենսդրությամբ եւ Սահմանադրությամբ: Որ հանցագործություններ բացահայտելիս երբեւէ չեն առաջնորդվելու որեւէ քաղաքական նկատառումներով»: Ուրիխանյանն ասաց, որ իրենք ամենայն ուշադրությամբ կհետեւեն համապատասխան մարմինների գործողություններին եւ առաջին իսկ պահին, երբ որ իրենց համար անհասկանալի կամ կասկածելի բան տեղի կունենա՝ անմիջապես կարձագանքեն:
Դիտարկմանը, որ Օսկանյանն արդեն իսկ կատարվածը որակել է «քաղաքական պատվեր», Տիգրան Ուրիխանյանն ասաց. «Ես եւ իմ գործընկերներն ուշադրության կենտրոնում ենք պահելու զարգացումները: ՀՀ ցանկացած քաղաքացու, քաղաքական կառուցողական գործունեություն իրականացնող որեւէ կազմակերպության, առավել եվս ԲՀԿ-ի ներկայացուցչի որեւէ իրավունքի ոտնահարման դեպքում, բնականաբար, կանգնելու ենք տվյալ մարդու կողքին»:
Կարդացեք նաև
Նելլի ԳՐԻԳՈՐՅԱՆ
