Տերյան փողոցում է գտնվում «Հայֆիլմ»-ին կից երիտասարդ կինոդերասանների ստուդիան, որտեղ այս պահին ուսանում Է 25 ուսանող:
Ստուդիա տանող ճանապարհն անցնում է աղբանոցի կողքող, իսկ ցուցանակն ամրացված է արդեն աղբանոցի վերածված վայրում: Անշուք մուտքից աստիճանները տանում են կիսաքանդ շենքի 2-րդ հարկ, որտեղ ստուդիային է հատկացված միայն մեկ սենյակ, որը ծառայում է եւ´ որպես դահլիճ, եւ´ որպես լսարան, եւ´ որպես հանդերձարան: Շենքում այսքան տարի վերանորոգում չի եղել, իսկ պատերը տարիների ընթացքում ճաքեր են տվել: Հատակը ճռճռում է, բեմը՝ նույնպես:
Ստուդիայի գեղարվեստական ղեկավար Հենրիկ Մարգարյանն ասում է, որ ստուդիան պետության կողմից ոչ մի ֆինանսավորում չի ստանում. «Ի՞նչ պետություն: Էդ պետության նստավայրը ես տեսա, որ կառուցեցին մեկ ամսում, Եվրոպան կնախանձի երեւի: Խոսքն ԱԺ-ի դահլիճի մասին է: Իրենք փողից խեղդվում են, բայց ափսոսում են այդ փողն ուղղել կինոյի զարգացման համար»:
Ստուդիայի ֆինանսական միակ աղբյուրրը Հայկական կինոկենտրոնն է, որտեղ իրենց համար հատուկ բյուջե է հատկացված:
«Հայֆիլմ» երիտասարդ կինոդերասանների ստուդիան հիմնադրվել է 1967 թվականին՝ ԽՍՀՄ կինոկոմիտեի հրամանով: Աշխատանքային երկար տարիների ընթացքում ստուդիան տվել է այնպիսի շրջանավարտներ, ովքեր այսօր մեր արվեստի հայտնի դեմքերից են՝ Դրամատիկական թատրոնի դերասանուհի Էվելինա Շահիրյան, ով մոտ 2 տարի առաջ ՀՀ վաստակավոր դերասանուհու կոչման արժանացավ, կինոռեժիսոր, դերասան, սցենարիստ, պրոդյուսեր Վիգեն Չալդրանյան, Երեւանի կամերային թատրոնի դերասանուհի Քեթրին Մանասյանը, երգչուհի Աիդա Սարգսյանը եւ այլք:
Թեպետ շենքի պայմանները վատն են, այստեղ ուսանողներն ուրախությամբ են սովորում: «Շենքի վատ պայմաններն այնքան էլ չեն խանգարում, ինձ համար կարեւորը լավ ուսում ստանալն է»,-ասում է ապագա ռեժիսոր Լուսինե Մուրադյանը:
Իսկ դերասանական բաժնի 2-րդ կուրսի ուսանող Գեւորգ Միրզոյանին անգամ հաճելի է այդ պայմաննեում սովորելը.
«Նույնիսկ հաճելի է այս պայմաններում սովորելը, քանի որ այստեղ կա հայ կինեմատոգրաֆիայի մեծերի շունչը: Լավ ուսում կարելի է ստանալ նաեւ այս պայմաններում»:
Sunset11` mynews.am
