Այսօր «Էրեբունի» պլազա համալիրի «Էրեբունի» սրահում տեղի ունեցավ «Տաշիր» բարեգործական հիմնադրամի և «Պահանջում ենք գիտության ֆինանսավորման ավելացում» ֆեյսբուքյան նախաձեռնության կողմից հայտարարված գիտական լրագրության և միջազգային գիտական հանդեսներում առավելագույն հղում ունեցող գիտնականների մրցույթների հաղթողների մրցանակաբաշխությունը:
«Պահանջում ենք գիտության ֆինանսավորման ավելացում» նախաձեռնության ներկայացուցիչ Խաչիկ Գեւորգյանը նշեց, որ նման մրցանակաբաշխությունները ոգեւորում են երիտասարդ գիտնականներին եւ հասարակական գիտակցություն ձեւավորում գիտնականի հանդեպ: «Մրցանակները տրվելու են միջազգային պարբերականներում առավելագույն հղումներ ունեցող հոդվածներ տպագրած երիտասարդ գիտնականներին: Ինչպես նաեւ, կպարգեւատրվեն այն լրագրողները, ովքեր հունվարից մինչ մայիսի տասն ընկած ժամանակահատվածում հրապարակել են գիտության խնդիրներին վերաբերող առնվազն 10 նյութ»,-ասաց Գեւորգյանը:
Նրա խոսքով՝ պետբյուջեից գիտության 0.24 տոկոս ֆինանսավորումն առնվազն պետք է կրկնապատկվի՝ հետագայում հասնելով նվազագույնը 1 տոկոսի: «Քաղաքական գործիչներն ավելի շատ պետք է մտածեն գիտության մասին»,-կարծում է Խաչիկ Գեւորգյանը:
Կարդացեք նաև
«Տաշիր» հիմնադրամի ներկայացուցիչ Արտակ Ճաղարյանը նշեց, որ գիտությունը մշտապես ունեցել է պետության հովանավորության կարիքը, սակայն վերջինիս տրամադրած գումարները բավարար չեն. «Մեր երկիրը կարող է վերածվել մտավոր ներուժ արտահանող երկրի, մինչդեռ մեր տաղանդավոր գիտնականները հաջողությամբ արտասահմանում են գործում: Հետեւաբար, պետք է նպաստել նաեւ նրանց վերադարձին»:
«Պահանջում ենք գիտության ֆինանսավորման ավելացում» նախաձեռնության ներկայացուցիչ, պրոֆեսոր Արթուր Իշխանյանը նկատեց, որ ԽՍՀՄ տարիներին հայ գիտնականների թիվը հասնում էր 20.000-ի, մինչդեռ այսօր՝ 4500-ի. «Գիտնականների ծերացման եւ ուղեղների արտահոսքի խնդիր ունենք: Եթե այդ գործընթացը չփորձենք կանգնեցնել, ապա 5-7 տարի հետո էլ գիտություն չենք ունենա»:
Մրցանակաբաշխության ընթացքում պարգեւատրվեցին 95 երիտասարդ գիտնական եւ 11 լրագրող:
Լուիզա ՍՈՒՔԻԱՍՅԱՆ
