Մորեխները շարունակում են փչացնել Մեղրու տարածաշրջանի գյուղերի այգիների բերքը, իսկ դրանց դեմ պայքարի համար, համայնքները գյուղնախարարությունից դեռեւս դեղորայք չեն ստացել:
Մեղրու տարածաշրջանի գյուղերում մեծ տարածում գտած մորեխներն արդեն մեկ ամիս է իսկական գլխացավանք են դարձել գյուղացիների համար: Շվանիձոր, Ալվանք եւ Նռնաձոր գյուղերի բնակիչների պտղատու այգիների բերքի զգալի մասը մեծ չափերի հասնող մորեխների կերի բաժին է դարձել: «Ծիրանի բերքի 25 տոկոսն արդեն փչացել է, հիմա էլ դեղձի խակ պտուղներն են ուտում: Երեք տեսակի մորեխներ են` տարբեր գույների ու չափերի, որոնք խիստ ագրեսիվ կերպով հարձակվում են բերքի վրա, կրծում, փչացնում բերքը, ինչի հետեւանքով որակազրկվում են ամբողջ պտուղները: Բերքի կեսը կրծում են եւ այն ոչ միայն շուկա տանելու համար չէ պիտանի լինում, այլեւ` չիր պատրաստելու: Հիմա էլ նույն վտանգը կսպառնա խաղողի բերքին, պոմիդորին, բիբարին, վարունգին, կարտոֆիլին: Արդեն սկսել են 3-4 սմ փոքր չափերի վարունգները կրծել: 10 օր առաջ ահազանգել ենք գյուղնախարարություն, որ Ալվանք, Շվանիձոր եւ Նռնաձոր գյուղերի մոտ 300 հա տարածքի համար դեղորայք տրամադրեն` մորեխների դեմ մասսայական պայքար կազմակերպելու համար, դեռ սպասում ենք», – տեղեկացնում է Շվանիձորի գյուղապետ Հովհաննես Օհանյանը:
Սակայն ինչպես պարզվում է, գյուղերում բերքը շարունակում է լայն թափով փչանալ եւ մորեխների կեր դառնալ, բայց դեղորայքը գյուղեր չի հասել եւ մորեխների դեմ պայքարի միջոցառումներ դեռ չեն էլ սկսվել, այնինչ գյուղացիներն օրեցօր զրկվում են իրենց մնացյալ բերքից: Տեղաբնակների մոտավոր հաշվարկներով՝ Ալվանք, Շվանիձոր եւ Նռնաձոր գյուղերում մորեխների բաժին է դարձել բերքի 50-60 տոկոսը:
Կարդացեք նաև
Շվանիձորի գյուղապետը հիշում է, որ մորեխներն իրենց տարածաշրջանում մեծ տարածում էին գտել նաեւ 7-8 տարի առաջ, երբ վնասել էին վար ու ցանքսը, իսկ թութունի 3.5 հա տարածքը դեղորայքի շնորհիվ են հազիվ կարողացել փրկել փչանալուց:
Մարզպետարանի գյուղատնտեսության եւ բնապահպանության վարչության պետ Սամվել Թանգյանի տեղեկատվությամբ` Մեղրու գյուղերում ամենաուշը 1-2 օրից մորեխների դեմ պայքարի միջոցառումներ կիրականացվեն:
Մերի ՍՈՂՈՄՈՆՅԱՆ
