Aravot.am-ի հունիսի 4-ի «Քահանան կարգալույծ է արվել, բայց որոշումը չեն տրամադրում» հոդվածում անդրադարձել էինք աստվածաբանության մագիստրոս Գենադի Մնացականյանի կամ տեր Մանուկի խնդրին, ում, ըստ Մայր Աթոռից ստացված հաղորդագրության, կարգալույծ են հռչակել, սակայն «կարգալուծվածը» դա չի ընդունում եւ պնդում է, որ իրեն չեն տրամադրել որոշման պատճենը:
Մայր Աթոռ Ս. Էջմիածնի տեղեկատվական համակարգի ղեկավար տեր Վահրամ քահանա Մելիքյանը պատասպանել է վերոնշյալ հոդվածին: Նա Aravot.am –ին հայտնեց հետեւյալը. «Գենադի Մնացականյանը 1992թ. կեղծարարությամբ ձեռնադրվել է որպես ամուսնացյալ քահանա ` իբրև իր կին ներկայացնելով ոմն Խաչատրյան Քրիստինեի: Այդ օրվանից ի վեր այդ տիկնոջը նա չի տեսել, այնուհետև ներկայացրել է, թե կինը վաղաժամ մահացել է Մոսկվայում, ում թաղմանը ինքը չի կարողացել ներկա գտնվել (ի դեպ, նշանակված հանձնաժողովի հարցաքննության ժամանակ քահանան չի կարողացել նաեւ մատնանշել կնոջ գերեզմանը): Հետագա տարիներին անհնազանդ ընթացքի պատճառով հեռացվել է Հարավային Ռուսաստանի և Սյունյաց թեմերից: Ստեղծված հանձնաժողովը, քննության առնելով Մանուկ քահանային առնչվող բոլոր փաստերը եւ վկայությունները, անկարելի է նկատել նրա հետագա քահանայագործությունը: Այս ամենը, ինչպես նաեւ ծառայության ընթացքում քահանայի կողմից դրսեւորած պահվածքը նկատի ունենալով` Եկեղեցին չի ցանկացել, որ իր հոտին առաջնորդի կեղծարարությամբ քահանայության աստիճան ստացած անձը: Իսկ կարգալույծ քահանայի Եկեղեցու կյանքի և առաքելության շուրջ վերջին շրջանում հաճախակի դարձած դատողությունները խնդրում ենք դիտարկել այն լույսի ներքո, որ ի պատասխան Գ. Մնացականյանի դիմումների՝ Մայր Աթոռը նպատակահարմար չի նկատել վերականգնել նրա քահանայական աստիճանը: Անձի կողմից ներկայիս որդեգրած ուղին ևս մեկ անգամ փաստում է կայացված որոշման հիմնավոր լինելը»:
Գոհար ՀԱԿՈԲՅԱՆ
