ՀՀ Լոռու մարզի ընդհանուր իրավասության դատարանի դատավոր Վարդուհի Հովնանյանի մայիսի 31-ի վճռով կարճվել է Լեռնապատի գյուղապետ Վանո Եղիազարյանի՝ ընդդեմ լեռնապատցի Բորիս Աշրաֆյանի, պատասխանող «Առավոտ» օրաթերթի՝ պատվին, արժանապատվությանը, եւ գործարար համբավին պատճառված վնասի հատուցման պահանջի մասին հայցը:
Այսօր «Առավոտը» ստացել է 5 թերթից բաղկացած դատարանի վճիռը:
Հիշեցնենք, որ գյուղապետը դիմել էր դատարան անցյալ տարվա սեպտեմբերի 1-ին, պահանջելով, որպեսզի Բորիս Աշրաֆյանից բռնագանձվի 500 000 ՀՀ դրամ իրեն՝ «Առավոտի» օգոստոսի 19-ի «Ով ում է զրպարտում» հրապարակման մեջ արտահայտած վիրավորանքների համար:
Դատարանը լսեց կողմերի իրավական դիրքորոշումները, իսկ «Առավոտն» իր առարկություններում գտել էր, որ հայցը ենթակա է ամբողջությամբ մերժման:
Կարդացեք նաև
«Առավոտը» հղում էր արել գործող «Զանգվածային լրատվության մասին» օրենքին, մարդու իրավունքների միջազգային նորմերին՝ խոսքի ազատության պաշտպանությանը, ՀՀ սահմանադրությանն ու «Տեղեկատվության ազատության մասին» օրենքին, ինչպես նաեւ ՀՀ սահմանադրական դատարանի անցյալ տարվա նոյեմբերի 15-ի որոշմանը, ուր մասնավորապես, ասվում էր.«Քննության առարկա հոդվածի/ՀՀ Քաղաքացիական օրենսգիրք, վիրավորանք եւ զրպարտություն/ իրավական բովանդակությունից բխում է, որ արտահայտությունը չի կարող որպես վիրավորանք որակվել, եթե այն ունի որոշակի փաստական հիմք: Այսինքն, պետք է ոչ թե վիրավորանք համարել գնահատողական դատողությունը, այլ անձի պատիվը, արժանապատվությունը կամ գործարար համբավը արատավորելու նպատակով կատարված հրապարակային արտահայտությունը»:
«Առավոտը» ներկայացրել էր նշված օրը ՀՀ կառավարության շենքի մոտ հանրահավաքին մասնակցելու եւ այն հանրությանը բարեխղճորեն ներկայացնելու մասին հիմքերը:
Ռուզան ՄԻՆԱՍՅԱՆ
