Այսօր ժամը 13-ից սկսված հորդառատ անձրեւ Գեղարքունիքի մարզում վերածվեց երկարատեւ տեղատարափի ու կարկուտի:
Գեղարքունիքի մարզպետարանի աշխատակազմի գյուղատնտեսության եւ բնապահպանության վարչության պետ Վանիկ Հովհաննիսյանը «Առավոտի» թղթակցին տեղեկացրեց, որ տեղատարափն ու կարկուտը մարզի գյուղատնտեսության լուրջ վնաս է հասցրել: Դեռ նոր ծլած կարտոֆիլի, կաղամբի եւ հացահատիկի ցանքսերն ու ցողունները գրեթե ամբողջությամբ հավասարվել են հողին:
«Այնքան կարկուտ էր եկել, որ ձյան պես ծածկել էր տարածաշրջանի բոլոր դաշտերը, հանդամասերը եւ տնամերձ հողամասերը»,- ասաց Վանիկ Հովհաննիսյանը:
Կարդացեք նաև
Այս պահից սկսած հաշվում են կարկուտի հասցրած վնասները, եւ երկու օրից պարզ կդառնան գյուղատնտեսությանը հասցված վնասի չափերը:
Բնակիչները հայտնում են, որ կարկուտը տարբեր չափերի էր, ամենախոշորը՝ ընկույզի չափ էր: Երկարատեւ կարկուտը կուտակվել է եւ կարկուտի շերտի հաստությունը կազմել է մոտ 30 սանտիմետր:
Անի ՊՈՂՈՍՅԱՆ
Լուսանկարները՝ Վարդուհի Բադալյանի, Աշխեն Սարգսյանի
