Հայաստանում ԱՄՆ-ի դեսպան Ջոն Հեֆերնի ներկայացմամբ` Երեւան Միացյալ Նահանգների պետքարտուղարի այցը հստակ մատնանշում է այն կարեւորությունը, որ տրվում է Հայաստանին ու տարածաշրջանին ԱՄՆ-ի կողմից:
Նման հայտարարություն Հեֆերնը արել է` իր տեսաբլոգում անդրադառնալով Միացյալ Նահանգների պետքարտուղար Հիլարի Քլինթոնի` տարածաշրջան օրերս կատարած այցին:
«[ԱՄՆ-ի] պետքարտուղար Հիլարի Քլինթոնը, [Հայաստանի] նախագահ Սարգսյանը եւ արտգործնախարար Նալբանդյանը միասին նշեցին ԱՄՆ-ի եւ Հայաստանի միջեւ դիվանագիտական հարաբերությունների հաստատման քսանամյակը` հունիսի 4-ին պետքարտուղարի Երեւան կատարած այցի ընթացքում: Սա պետքարտուղարի երկրորդ այցն էր Հայաստան, որը հստակ մատնանշում է այն կարեւորությունը, որ տրվում է Հայաստանին ու տարածաշրջանին պետքարտուղարի եւ նախագահի կողմից», – ասել է դեսպանը։ – «Քսանամյակի թեմայից զատ` պետքարտուղարը բոլոր հանդիպումներում եւ բոլոր միջոցառումների ժամանակ շեշտադրեց գործընկերությունն ու արժեքները: Նա հանդիպում ունեցավ Հայաստանում պարգեւների արժանացած 11 անձանց հետ, որոնց թվում էին մարդու իրավունքների պաշտպանի, խիզախ կնոջ, կառավարության բարեփոխումների առաջատարի, քաղաքացիական ակտիվության, ինչպես նաեւ մամուլի ազատության մրցանակներին արժանացած անձինք: Մեր այս հիանալի գործընկերների մասին ես առանձին տեսբլոգ կներկայացնեմ առաջիկա շաբաթների ընթացքում»:
«Պետքարտուղարի այցը մեկ անգամ եւս ի ցույց դրեց, որ իրական գործընկերությունը խարսխվում է ընդհանուր արժեքների վրա», – ընդգծել է Ջոն Հեֆերնը։
Կարդացեք նաև
Նշելով, որ Հայաստանի նախագահի եւ արտգործնախարարի հետ հանդիպումներում պետքարտուղարը քննարկել է ներքին եւ տարածաշրջանային հարցեր, դեսպանը շարունակել է. – «Լեռնային Ղարաբաղի հետ կապված` պետքարտուղարը դատապարտեց հրադադարի խախտման վերջին միջադեպը, որին զոհ են գնացել երեք հայ զինվորներ: Նա խոստացավ Բաքվում խստորեն նշել, որ ուժի կիրառումը չի կարող Լեռնային Ղարաբաղի հակամարտության լուծում ապահովել: Նա նաեւ հավաստիացրեց [Հայաստանի] նախագահին եւ արտգործնախարարին, որ Միացյալ Նահանգները` որպես Մինսկի խմբի համանախագահ, շարունակում է հավատարիմ մնալ Հելսինկյան ակտի երեք սկզբունքներին, այն է` ուժի կամ ուժի սպառնալիքի չկիրառման, տարածքային ամբողջականության ու ազգերի հավասար իրավունքների ու ինքնորոշման սկզբունքները` որպես ինտեգրված ամբողջություն, որ հիմնարար նշանակություն ունի հակամարտության լուծման համար»։
«Հայ – թուրքական հաշտեցման հետ կապված` պետքարտուղարը վերահաստատեց իր կարծիքը, որ արձանագրությունների վավերացման հետ կապված գնդակը Թուրքիայի դաշտում է», – ասել է Հայաստանում Միացյալ Նահանգների դեսպանը։
Հեֆերնը նշել է, որ ԱՄՆ-ի պետքարտուղարը եւ Հայաստանի նախագահը քննարկել են նաեւ ընտրություններին, առեւտրին, ներդրումներին, կառավարմանը վերաբերող հարցեր:
«Պետքարտուղարը հորդորեց ավելի մեծ բարեփոխումներ կատարել ավելի մեծ թափանցիկությամբ, որպեսզի Հայաստանը լինի ավելի ժողովրդավար, ավելի բարեկեցիկ ու ավելի ապահով երկիր», – ասել է դեսպանը։
«Ընդհանուր արժեքները իրական գործընկերության հիմքն են», – հայտարարել է Ջոն Հեֆերնը իր տեսաբլոգում։
«Ազատություն» ռադիոկայան
