Ինչպես «Aravot.am»-ը տեղեկացրել էր, ՄԻԵԴ կայացրած որոշմամբ՝ Հայաստանում խախտվել է Մարդու իրավունքների կոնվենցիայի 5-րդ հոդվածը, եւ ցմահ դատապարտյալ Արարատ Մուրադխանյանը 2004 թվականից 2007 թվականը անօրինական կերպով է կալանքի տակ պահվել: Տեղեկացրել էին նաեւ, որ Հայաստանի կառավարությունը պարտավորվելու է ցմահ ազատազրկման դատապարտված Արարատ Մուրադխանյանին որպես փոխհատուցում վճարել 6000 եվրո:
«Ի՞նչ հիմքով է պարտվել Հայաստանի Հանրապետությունը, եւ արդյոք նշված գումարն արտացոլո՞ւմ է դիմումատուի պահանջն ամբողջությամբ», գործընթացին մոտ կանգնած աղբյուրը «Փաստինֆո» գործակալության հարցերին պատասխանել է, որ «Ի սկզբանե Հայաստանի Հանրապետությունից դիմումատուն պահանջել է 100 000 եվրո՝ որպես նյութական վնաս եւ 250 հազար եվրո՝ որպես բարոյական կամ ոչ նյութական վնաս: Ընդհանուր առմամբ, այս գործով դիմումատուն երկրից պահանջել է 350 հազար եվրո: Դրա դիմաց Մարդու իրավունքների եվրոպական դատարանը բավարարել է միայն 6000 եվրոյի պահանջը՝ կառավարության առարկությունների հիման վրա»: Նույն աղբյուրի համաձայն, որոշում կայացնելու համար հիմք են ծառայել ոչ թե պետական մարմինների գործողությունները, այլ միայն օրենսդրության անկատարությունը եւ դրա անհամապատասխանությունը Մարդու իրավունքների եվրոպական կոնվենցիայի պահանջներին:
Տեղեկացանք, որ Ա. Մուրադխանյանն իր օգտին կայացված ԵԴ որոշման մասին իմացել է միայն երեկ՝ կնոջից, հեռախոսազանգի միջոցով:
Ա. Մուրադխանյանի փաստաբանը, չի բացառվում, որ հանդես գա մամուլի ասուլիսով:
Կարդացեք նաև
Ռ. ՄԻՆԱՍՅԱՆ
«Առավոտ» օրաթերթ
