Հատված ԳԱԱ արեւելագիտության ինստիտուտի տնօրեն, թուրքագետ Ռուբեն Սաֆրաստյանի հետ հարցազրույցից:
–Հիլարի Քլինթոնի իներտ արձագանքը իր տարածաշրջանային այցի օրերին Ադրբեջանի սադրիչ դիվերսիաներին եւ մասնակցությունը Ստամբուլում «Ահաբեկչության դեմ պայքարի համաշխարհային ֆորումին» համահո՞ւնչ են:
-Ճիշտ ու ամբողջական պատասխանի համար անհրաժեշտ է աշխարհաքաղաքական որոշակի վերլուծություն կատարել:
Կարծում եմ, Ադրբեջանը իր սադրիչ քաղաքականությունը պայմանավորում է այն հանգամանքով, որ տրամադրում է սեփական տարածքը Իրանի դեմ ռազմական գործողություններ նախապատրաստելու համար: Իսկ եթե Արեւմուտքը ռազմական գործողությունների անցնի, ապա ակնհայտ է, որ Ադրբեջանը իր տարածքը տրամադրելու է նաեւ այդ նպատակով:
Ադրբեջանը փորձում է օգտագործել այս հանգամանքը Արցախի հակամարտությունը ռազմական ճանապարհով լուծելու համար: Հայաստանում եւ Ադրբեջանում Քլինթոնի գտնվելու օրերին Հայաստանի դեմ ոտնձգություններ սանձազերծելու միջոցով Ալիեւը փորձեց հասկանալ, թե Միացյալ Նահանգները որքանով է իրեն աջակցում, որքան է պատրաստ հանդուրժել: Ցավոք, ոչ ԵԱՀԿ Մինսկի խումբը, ոչ էլ ԱՄՆ-ն ադրբեջանական դիվերսիաների նկատմամբ անհրաժեշտ հստակ դիրքորոշում առ այսօր չեն արտահայտել, Ադրբեջանի ագրեսիան չի դատապարտվել:
Այս իրավիճակը շատ վտանգավոր է, քանզի եթե Ադրբեջանը հստակ մեսիջ ստանար Մինսկի խմբից կամ ԱՄՆ-ից, որ «չի կարելի», անթույլատրելի է նման գործելակերպը, պաշտոնական Բաքուն ավելի զուսպ կլիներ: Իսկ Արեւմուտքի այս լղոզված արձագանքը միայն կոգեւորի Ալիեւին, եւ ադրբեջանական ագրեսիան առավել լայնածավալ կարող է դառնալ:
Գեւորգ ՀԱՐՈՒԹՅՈՒՆՅԱՆ
Կարդացեք նաև
«Հայոց աշխարհ»
