Տավուշի մարզում արդյունաբերական խոշոր ձեռնարկություններ չկան: Սակայն գյուղատնտեսական մարզում գյուղմթերքի մթերման կետեր, շուկաներ չեն գործում: Տավուշում ոչխարի բրդի ընդունման կետեր չկան, բուրդը հիմնականում օգտագործվում է ընտանիքի անդամների եւ հարսնացուների օժիտների համար ներքնակներ, վերմակներ կարելու համար: Շատ տեղերում հայտարարություներ են փակցված մարդկանց մազ ընդունելու վերաբերյալ, նման հայտարարություններ տրվում են նաեւ մարզային լրատվամիջոցներով:
Գյուղատնտեսական մարզում չեն գործում նաեւ կաթի ընդունման կետեր: Մի քանի տարի առաջ տարբեր ծրագրերով կաթի ընդունման կետեր ստեղծվեցին Բերդի տարածաշրջանի Նավուր, Տավուշ, Նորաշեն, Վարագավան, Իջեւանի տարածաշրջանի Ազատամուտ գյուղերում: Դրանք բոլորն էլ ներկայումս անգործության են մատնված: Պատճառն այն է, որ կաթ վերամշակող ընկերությունները ցածր գնով են այն ընդունում, գյուղացիներն էլ հրաժարվում են այն հանձնել:
Բերդի տարածաշրջանի Նավուրի գյուղապետ Արամ Նիգոյանն այս առթիվ ասաց.
– Ես նաեւ անասնապահությամբ եմ զբաղվում, սարում պահվող իմ կովերից օրական 150լ կաթ ստանում: Կաթ ընդունող չկա,ստիպված պանիր եմ պատրաստում: Բայց պանիր առնող էլ չկա: Երեւանում կաթի փոշուց պատրաստված պանրի կիլոգրամը 2000 դրամով են վաճառում, ես անարատ կաթի պանիրը 1000 դրամով եմ տալիս, թող գան տանեն:
Կարդացեք նաև
Ոսկան ՍԱՐԳՍՅԱՆ
